എറണാകുളം- അങ്കമാലി അതിരൂപതയിലെ വിമത നീക്കത്തെ പിന്തുണച്ചതിന് ബിഷപ്പ് ആന്റണി കരിയിലിനെതിരെ വത്തിക്കാന്റെ നടപടി. ബിഷപ്പ് ആന്റണി കരിയിലിനെ അതിരൂപതയുടെ മേലദ്ധ്യക്ഷ സ്ഥാനത്തുനിന്ന് മാറ്റി. മാര് ആന്ഡ്രൂസ് താഴത്ത് എറണാകുളം അങ്കമാലി അതിരൂപത അഡ്മിനിസ്ട്രേറ്ററാകും. വത്തിക്കാനാണ് പ്രഖ്യാപനം നടത്തിയത്.
ഇതുസംബന്ധിച്ച പ്രഖ്യാപനം ജൂലൈ 30 ശനിയാഴ്ച ഇറ്റാലിയന് സമയം ഉച്ചയ്ക്ക് 12ന് വത്തിക്കാനിലും ഉച്ചകഴിഞ്ഞ് 3.30ന് സഭാകാര്യാലയമായ മൗണ്ട് സെന്റ് തോമസിലും എറണാകുളം അങ്കമാലി അതിരൂപതയുടെ ആസ്ഥാനത്തും നടന്നു. അതിരൂപതയുടെ പുതിയ ഭരണ സംവിധാനത്തെ കുറിച്ചുള്ള അറിയിപ്പ് വെള്ളിയാഴ്ച്ച ഡല്ഹിയില് നിന്ന് അപ്പസ്തോലിക് ന്യൂണ്ഷോ ആര്ച്ചു ബിഷപ്പ് ലെയോപോള്ദോ ജിറേല്ലി മേജര് ആര്ച്ചു ബിഷപ്പ് കര്ദിനാള് മാര് ജോര്ജ് ആലഞ്ചേരിക്ക് നല്കിയിരുന്നു.
സിനഡ് തീരുമാനം മറികടന്ന് വിമത നീക്കത്തിന് പിന്തുണ നല്കിയെന്ന ആരോപണമാണ് ബിഷപ്പ് ആന്റണി കരിയിലിനെതിരെ ഉയര്ന്നത്. കര്ദ്ദിനാള് മാര് ജോര്ജ് ആലഞ്ചേരിക്കെതിരായ ഭൂമി വില്പ്പന വിവാദത്തിന് പിന്നാലെ ബിഷപ്പ്, കുര്ബാന ഏകീകരണത്തിലും സിനഡ് തീരുമാനം പരസ്യമായി എതിര്ത്ത് കര്ദ്ദിനാള് വിരുദ്ധ നീക്കത്തിന് ഒപ്പം നിന്നിരുന്നു.
1950 മാര്ച്ച് 26-ന് ചേര്ത്തലയില് ജനിച്ച ആന്റണി കരിയില് സി.എം.ഐ സഭാംഗമാണ്. 1977-ലാണ് അദ്ദേഹം പുരോഹിതനാകുന്നത്. സി.എം.ഐ സഭയുടെ പ്രിയോര് ജനറലായും അദ്ദേഹം പ്രവര്ത്തിച്ചിട്ടുണ്ട്. 2015 ഒക്ടോബറിലാണ് അദ്ദേഹം ബിഷപ്പായി അഭിഷിക്തനാകുന്നത്.