തിരഞ്ഞെടുപ്പ് നടക്കാനിരിക്കുന്ന നിലമ്പൂരിൽ പുതിയ രാഷ്ട്രീയ മുന്നണി രൂപീകരിച്ച് പി വി അൻവർ. തൃണമൂല് കോണ്ഗ്രസിന്റെ പിന്തുണയോടെയാണ് മുന്നണി. ജനകീയ പ്രതിപക്ഷ പ്രതിരോധ മുന്നണി എന്ന പേരിലാണ് പുതിയ മുന്നണി രൂപീകരിച്ചിരിക്കുന്നത്.
നിരവധി ചെറുകിട സംഘടനകളുടെ ആവശ്യമായിരുന്നു ഒരു മുന്നണി രൂപീകരിക്കുകയെന്നതെന്ന് പി വി അൻവർ പറഞ്ഞു. അവരുടെ താത്പര്യപ്രകാരമാണ് ഒരു മുന്നണിയുടെ കീഴില് മത്സരിക്കുകയെന്ന തീരുമാനമുണ്ടായത്. നിലമ്പൂരില് ഉയര്ത്തുന്ന രാഷ്ട്രീയ മുദ്രവാക്യം ജനകീയ പ്രതിപക്ഷ പ്രതിരോധ മുന്നണിയുടേതായിരിക്കുമെന്ന് പിവി അന്വര് പറഞ്ഞു.
അതേസമയം ആദ്യം പാര്ട്ടി ചിഹ്നം, അത് ലഭിച്ചില്ലെങ്കില് സ്വതന്ത്ര ചിഹ്നത്തില് മത്സരിക്കുമെന്ന് പിവി അന്വര് പറഞ്ഞു. വിഡി സതീശന്റെ മനസിലും ശരീരത്തിലും അഹങ്കാരമാണ്. അദേഹം മുഖ്യമന്ത്രിയാകുമ്പോള് കൈപൊന്തിക്കാനുള്ള ആളുകള്ക്ക് മാത്രമാകും കേരളത്തില് സീറ്റ് ലഭിക്കുകയെന്ന് പിവി അന്വര് രൂക്ഷ വിമര്ശനം ഉന്നയിച്ചു. വിഡി സതീശന് ഇന്നെടുത്തുകൊണ്ടിരിക്കുന്ന നിലപാട് 2026ലെ നിയമസഭ തിരഞ്ഞെടുപ്പില് തിരിച്ചടിയുണ്ടാക്കുമെന്ന് അന്വര് പറഞ്ഞു.