പാലാരിവട്ടം പാലം അഴിമതി കേസിൽ ടി.ഒ സൂരജിനെ ഇന്ന് വിജിലൻസ് വീണ്ടും ചോദ്യം ചെയ്യും. മൂവാറ്റുപുഴ സബ് ജയിലിലെത്തിയാണ് അന്വേഷണ ഉദ്യോഗസ്ഥന് ചോദ്യം ചെയ്യുന്നത്. അഴിമതിയിൽ മുൻ മന്ത്രി ഇബ്രാഹിംകുഞ്ഞിന് പങ്കില്ലെന്ന രീതിയിൽ സമർപ്പിച്ച സത്യവാങ്മൂലം വിജിലൻസ് ഹൈക്കോടതിയിൽ പുതുക്കി നൽകും.
മുൻ മന്ത്രി വി.കെ ഇബ്രാഹിംകുഞ്ഞിനെതിരെ മാധ്യമങ്ങളോടും കോടതിയില് സമര്പ്പിച്ച ജാമ്യാപേക്ഷയിലും വെളിപ്പെടുത്തൽ നടത്തിയ സാഹചര്യത്തിലാണ് ടി.ഒ സൂരജിനെ വിജിലൻസ് വീണ്ടും ചോദ്യം ചെയ്യുന്നത് . ഇക്കാര്യം ആവശ്യപ്പെട്ട് അന്വേഷണ ഉദ്യോഗസ്ഥന് മുവാറ്റുപുഴ വിലിജിലന്സ് കോടതിയില് അപേക്ഷ നല്കിയിരുന്നു. ഈ അപേക്ഷ അനുവദിച്ച കോടതി ഇന്ന് രാവിലെ 10 മുതൽ ഒരു മണി വരെ ജയിലിലെത്തി ചോദ്യം ചെയ്യാനാണ് അന്വേഷണ ഉദ്യോഗസ്ഥന് അനുമതി നൽകിയത്. ടി ഒ സുരജ് അടക്കമുള്ള നാല് പ്രതികളാണ് നിലവില് റിമാന്ഡിലുള്ളത്. ഇതില് സുരജിനെ മാത്രമാണ് ചോദ്യം ചെയ്യാന് വിജിലന്സ് അപേക്ഷ നല്കിയത്. നേരത്തെ നാല് ദിവസത്തെ കസ്റ്റഡിയില് പ്രതികളെ ചോദ്യം ചെയ്തിരുന്നു.
ജാമ്യാപേക്ഷയിൽ ടി.ഒ സൂരജ് മുൻ മന്ത്രിക്കെതിരെ ഉന്നയിച്ച വാദങ്ങള് തളളിയാണ് വിജിലന്സ് ഇന്നലെ ഹൈക്കോടതിയില് റിപ്പോര്ട്ട് സമര്പ്പിച്ചത്. വി.കെ ഇബ്രാഹിംകുഞ്ഞിന്റെ ഇടപെടല് പരിശോധിച്ച് വരുകയാണെന്നുമാണ് വിജിലന്സ് അറിയിച്ചത്. എന്നാൽ സൂരജിനെ ചോദ്യം ചെയ്യുന്നതിൽ നിന്ന് ലഭിക്കുന്ന വിവരങ്ങൾ കൂടി ഉൾപ്പെടുത്തി പുതിയ സത്യവാങ്മൂലം ഹൈക്കോടതിയിൽ സമർപ്പിക്കാനൊരുങ്ങുകയാണ് വിജിലൻസ്.