ലോണ് ആപ്പുകളിലൂടെ വായ്പാ തട്ടിപ്പുകള്ക്ക് ഇരയായവര്ക്ക് പരാതി നല്കാന് പ്രത്യേക വാട്സ്ആപ്പ് നമ്പര് നിലവില് വന്നു. അംഗീകാരമില്ലാത്ത ലോണ് ആപ്പുകളില് നിന്ന് വായ്പയെടുത്ത് കുരുക്കിലായതിനെ തുടർന്ന് പലരും ആത്മഹത്യ ചെയ്തതോടെയാണ് നടപടി. എറണാകുളം കടമക്കുടിയിലെ യുവതിയും കുടുംബവും ജീവനൊടുക്കിയതിനു പിന്നാലെ വയനാട് സ്വദേശി അജയ് രാജും വായ്പാ തട്ടിപ്പിനെ തുടര്ന്ന് ആത്മഹത്യ ചെയ്തിരുന്നു.
94979 80900 എന്ന നമ്പറില് പൊലീസിനെ ബന്ധപ്പെട്ട് 24 മണിക്കൂറും പരാതി കൈമാറാനുള്ള സൗകര്യമുണ്ട്. നമ്പറില് നേരിട്ട് വിളിച്ച് പരാതി പറയാനാവില്ല. പകരം ടെക്സ്റ്റ്, ഫോട്ടോ, വീഡിയോ, വോയിസ് എന്നിവയായി മാത്രമേ പരാതി നല്കാന് സാധിക്കൂ. പരാതി അറിയിക്കുന്നവരെ ആവശ്യമെങ്കില് പൊലീസ് തിരികെ വിളിച്ച് വിവരശേഖരണം നടത്തും.
തിരുവനന്തപുരം പൊലീസ് ആസ്ഥാനത്തിലാണ് വായ്പാ തട്ടിപ്പുകളെ പ്രതിരോധിക്കുന്ന സംവിധാനം പ്രവര്ത്തനം ആരംഭിച്ചിരിക്കുന്നത്. അംഗീകാരമില്ലാത്ത ലോണ് ആപ്പുകള്ക്കെതിരെ പൊലീസ് പ്രചരണം ആരംഭിച്ചിട്ടുണ്ട്. ജില്ലാ പൊലീസ് മേധാവിമാരും ഇത്തരം തട്ടിപ്പുകള്ക്കെതിരെ പ്രചരണം നടത്തും.
കടമക്കുടിയില് മക്കളെ കൊന്ന് ദമ്പതികള് ആത്മഹത്യ ചെയ്ത സംഭവത്തില് ഓണ്ലൈന് ലോണ് ആപ്പുകളുടെ നിരന്തര ഭീഷണിയെന്നാണ് കുടുംബം ആരോപിച്ചത്. ഓണ്ലൈന് ലോണ് തട്ടിപ്പുകാര് യുവതിയുടെ മോര്ഫ് ചെയ്ത ചിത്രങ്ങള് ബന്ധുക്കളുടെ ഫോണിലേക്ക് അയച്ചിരുന്നു. യുവതിയുടെ മരണ ശേഷവും ഇത്തരം സന്ദേശങ്ങള് ബന്ധുക്കള്ക്ക് ലഭിച്ചിരുന്നു. സംഭവത്തില് പൊലീസ് അന്വേഷണം തുടരുകയാണ്.
കടമക്കുടിയിലെ സംഭവം നടന്ന് ഏതാനും ദിവസങ്ങള് കഴിയുമ്പോഴാണ് വയനാട് മീനങ്ങാടി പൊലീസ് സ്റ്റേഷന് പരിധിയിലെ അരിമുളയില് അജയ് രാജ് ആത്മഹത്യ ചെയ്തത്. സംഭവത്തിന് പിന്നില് ലോണ് ആപ്പുകാരുടെ ഭീഷണിയാണെന്ന് പ്രാഥമിക അന്വേഷണത്തില് പൊലീസിന് വ്യക്തമായിരുന്നു. അജയുടെ മരണത്തിന് ഏതാനും മിനുട്ടുകള്ക്ക് മുന്പും ലോണ് ആപ്പുകാര് മോര്ഫ് ചെയ്ത ചിത്രങ്ങള് അയച്ച് ഭീഷണിപ്പെടുത്തിയിരുന്നു.