കണ്ണൂര് മുന് എഡിഎം നവീന് ബാബുവിന്റെ മരണവുമായി ബന്ധപ്പെട്ട് മാനനഷ്ടക്കേസ് ഫയല് ചെയ്ത് നവീന് ബാബുവിന്റെ കുടുംബം. കണ്ണൂര് ജില്ലാ പഞ്ചായത്ത് മുന് പ്രസിഡന്റ് പി പി. ദിവ്യ, നവീന് ബാബു കൈക്കൂലി വാങ്ങിയെന്ന് ആരോപണമുന്നയിച്ച ടി വി പ്രശാന്തന് എന്നിവര്ക്കെതിരെയാണ് നവീന് ബാബുവിന്റെ കുടുംബം മാനനഷ്ടക്കേസ് ഫയല് ചെയ്തത്. നവീന് ബാബുവിനെ അഴിമതിക്കാരനെന്ന് തെറ്റായി പൊതുസമൂഹത്തിന് മുന്നില് ചിത്രീകരിച്ചു. മരണശേഷവും പ്രശാന്തന് പലതവണ നവീന് ബാബുവിനെ അപമാനിക്കുന്നത് ആവര്ത്തിച്ചു എന്നാണ് ഹര്ജിയിലെ ആരോപണം. ഹര്ജി ഫയലില് സ്വീകരിച്ച പത്തനംതിട്ട സബ് കോടതി ദിവ്യയ്ക്കും പ്രശാന്തിനും കോടതി നോട്ടീസ് അയച്ചു. ഹര്ജി അടത്ത മാസം 11ന് പരിഗണിക്കും.
65 ലക്ഷം രൂപ നഷ്ടപരിഹാരം നല്കണമെന്നാവശ്യപ്പെട്ടാണ് കുടുംബം പി പി. ദിവ്യ, നവീന് ബാബു കൈക്കൂലി വാങ്ങിയെന്ന് ആരോപണമുന്നയിച്ച ടി വി പ്രശാന്തനെമെതിരെ കോടതിയില് ഹര്ജി ഫയല് ചെയ്തത്. നേരത്തെ എഡിഎം നവീന് ബാബുവിന്റെ മരണത്തില് സിബിഐ അന്വേഷണം വേണമെന്ന ഭാര്യ മഞ്ജുഷയുടെ ഹര്ജി ഹൈക്കോടതി തള്ളിയിരുന്നു. എ.ഡി.എം. നവീന്ബാബുവിന്റെ മരണവുമായി ബന്ധപ്പെട്ട ലാന്ഡ് റവന്യൂ ജോയിന്റ് കമ്മിഷണര് നവീന്ബാബു കൈക്കൂലി വാങ്ങിയതിന് തെളിവില്ലെന്ന് കണ്ടെത്തിയിരുന്നു. നവീന് ബാബു കൈക്കൂലി വാങ്ങിയതിന് തെളിവുകളൊന്നുമില്ല. പെട്രോള് പമ്പിന് എതിര്പ്പില്ലാ രേഖ നല്കുന്നതില് നവീന് ബാബുവിന്റെ ഭാഗത്തുനിന്ന് കാലതാമസമുണ്ടായിട്ടില്ലെന്നും എ. ഗീതയുടെ റിപ്പോര്ട്ടില് പറയുന്നുണ്ടായിരുന്നു. കണ്ണൂര് എ.ഡി.എമ്മായിരുന്ന നവീന് ബാബുവിനെ പരസ്യമായി അപമാനിക്കാന് പി.പി. ദിവ്യ ആസൂത്രിതമായി നീക്കം നടത്തിയതായി ലാന്ഡ് റവന്യൂ ജോയിന്റ് കമ്മിഷണറുടെ റിപ്പോര്ട്ടില് മൊഴികളുണ്ട്. ദിവ്യ യാത്രയയപ്പ് ചടങ്ങിലേക്ക് യാദൃച്ഛികമായി വന്നതാണെന്ന വാദങ്ങളെ തള്ളുന്നതാണ് മൊഴികള്. പരിപാടി ചിത്രീകരിക്കാന് ആവശ്യപ്പെട്ടതും ദൃശ്യങ്ങള് കൈപ്പറ്റിയതും ദിവ്യയാണെന്ന് പ്രാദേശിക ചാനലായ കണ്ണൂര്വിഷന് പ്രതിനിധികള് ലാന്ഡ് റവന്യൂ ജോയിന്റ് കമ്മിഷണര്ക്ക് മൊഴി നല്കി.
2024 ഒക്ടോബര് 15 നാണ് നവീന് ബാബുവിനെ കണ്ണൂര് പള്ളിക്കുന്നിലെ ക്വാര്ട്ടേഴ്സില് തൂങ്ങിമരിച്ച നിലയില് കണ്ടെത്തിയത്. സ്ഥലംമാറിപോകുന്ന കണ്ണൂര് എഡിഎം നവീന് ബാബുവിന് 2024 ഒക്ടോബര് 14 ന് വൈകീട്ട് റവന്യു ഉദ്യോഗസ്ഥര് നല്കിയ യാത്രയയപ്പ് ചടങ്ങിലേക്ക് ക്ഷണമില്ലാതെ എത്തിയായിരുന്നു ജില്ലാപഞ്ചായത്ത് പ്രസിഡന്റ് പിപി ദിവ്യയുടെ അധിക്ഷേപ പ്രസംഗം. ദിവ്യയുടെ വാക്കുകളാണ് നവീന് ബാബുവിന്റെ ജീവനെടുത്തതെന്നാണ് കുടുംബം ആരോപിക്കുന്നത്. രാത്രി 8.45 ന് മലബാര് എക്സ്പ്രസില് ചെങ്ങന്നൂരിലെ വീട്ടിലേക്ക് പോകേണ്ട നവീന് ബാബു, കണ്ണൂര് റയില്വെ സ്റ്റേഷന് സമീപത്ത് എത്തിയെങ്കിലും ട്രെയിന് കയറിയില്ല. പിറ്റേന്ന് രാവിലെ ഏഴ് മണിക്ക് പള്ളിക്കുന്നിലെ ക്വാട്ടേഴ്സില് ഡ്രൈവര് എത്തിയപ്പോള് കണ്ടത് നവീന് ബാബുവിനെ തൂങ്ങിമരിച്ച നിലയിലാണ്. യാത്രയയപ്പ് യോഗത്തിലെ അധിക്ഷേപ പരാമര്ശം അപ്പോഴേക്കും നാടെങ്ങും പടര്ന്നിരുന്നു. രണ്ടാംനാള് ആത്മഹത്യാപ്രേരണാ കുറ്റത്തിന് സിപിഎം നേതാവ് കൂടിയായ പിപി ദിവ്യയ്ക്കെതിരെ പൊലീസ് കേസെടുത്തു. സമ്മര്ദത്തെത്തുടര്ന്ന് ജില്ലാ പഞ്ചായത്ത് പ്രസിഡന്റ് സ്ഥാനത്തുനിന്ന് ദിവ്യ രാജിവെക്കുകയും ചെയ്തു.