പാലക്കാട് ആലത്തൂരിൽ ദേശീയപാത ഇടിഞ്ഞ് താഴ്ന്നു. പാലക്കാട് നിന്ന് തൃശൂർ പോകുന്ന രണ്ടുവരി പാതയാണ് ഇടിഞ്ഞ് താഴ്ന്നത്. സ്വാതി ജംഗ്ഷന് സമീപം ഇന്ന് പുലർച്ചയോട് കൂടിയായിരുന്നു സംഭവം. വാഹനങ്ങൾ പോകുന്നതിനിടയിലാണ് റോഡ് ഇടിഞ്ഞു താഴ്ന്നത്. കൾവേർട്ട് നിർമ്മാണം നടക്കുന്ന റോഡ് ആണ് താഴ്ന്നത്. സംഭവത്തെ തുടർന്ന് വാഹന ഗതാഗതം നിർത്തിവെച്ചു.
കൾവർട്ട് നിർമാണം പൂർത്തിയാക്കിയ ശേഷം ഗതാഗതം പുനസ്ഥാപിക്കുമെന്നാണ് ദേശീയപാത അതോറിറ്റി ഉദ്യോഗസ്ഥർ അറിയിക്കുന്നത്. ജെസിബി എത്തി റോഡിന്റെ പണി തുടങ്ങിയിട്ടുണ്ട്. അതേസമയം സംസ്ഥാനത്ത് നിരവധി സ്ഥലങ്ങളിൽ നിർമാണത്തിലിരിക്കുന്ന ദേശീയ പാത 66ൽ വിള്ളലുകൾ ഉണ്ടായിക്കൊണ്ടിരിക്കുകയാണ്.
സംഭവത്തിൽ ദേശീയ പാത അതോറിറ്റിക്കെതിരെ ഹൈക്കോടതി രൂക്ഷവിമർശനം ഉന്നയിച്ചിരുന്നു. ദേശീയപാതാ നിർമ്മാണത്തിൽ ദേശീയപാതാ അതോറിറ്റി വീഴ്ച സമ്മതിക്കുകയും തകർന്ന പാതകളിൽ ഘടനാപരമായ മാറ്റം വരുത്തുമെന്ന് കോടതിയെ അറിയിക്കുകയും ചെയ്തിട്ടുണ്ട്. ദേശീയ പാത തകർന്ന ഇടങ്ങളിലെ കരാർ കമ്പനികൾക്കെതിരെ നടപടിയെടുത്തെന്നും അതോറിറ്റി വ്യക്തമാക്കിയിട്ടുണ്ട്.
