വയനാട് ജില്ലയലില് മാവോയിസ്റ്റുകളെ പിടികൂടാന് ലുക്ക് ഔട്ട് നോട്ടീസ് പുറത്ത് ഇറക്കി പൊലീസ്. മാവോയിസ്റ്റുകളെ കുറിച്ച് വിവരങ്ങള് നല്കുന്നവര്ക്ക് പാരിതോഷികവും പ്രഖ്യാപിച്ചിട്ടുണ്ട്. സംസ്ഥാനത്ത് രജിസ്റ്റര് ചെയ്തിട്ടുള്ള വിവിധ കേസുകളില് പ്രതികളായ മാവോയിസ്റ്റുകള്ക്കായാണ് ലുക്ക് ഔട്ട് നോട്ടീസ് പുറത്തിറക്കിയിരിക്കുന്നത്.
ലുക്ക് ഔട്ട് നോട്ടീസ് പുറത്തിറക്കി പൊലീസ് അന്വേഷിക്കുന്നവര് നിയമ വിരുദ്ധ പ്രവര്ത്തനങ്ങളില് ഏര്പ്പെട്ട് രാജ്യത്തിന് ഭീഷണിയാകുന്നുവെന്നും ഇവരെ നിയമത്തിന് മുന്നില് കൊണ്ടുവരേണ്ടതുണ്ടെന്നും പൊലീസ് പുറത്തിറക്കിയ നോട്ടീസില് പറയുന്നു. മാവോയിസ്റ്റുകളുടെ അറസ്റ്റിലേക്ക് നയിക്കുന്ന ശരിയായ വിവരങ്ങള് നല്കുന്നവര്ക്ക് പാരിതോഷികങ്ങളും പൊലീസ് വാഗ്ദാനം ചെയ്യുന്നു.
അതേ സമയം മാവോയിസ്റ്റ് പ്രവര്ത്തനങ്ങളില് ഏര്പ്പെട്ടിരിക്കുന്നവര്ക്ക് കീഴടങ്ങാനുള്ള അവസരവും പ്രഖ്യാപിച്ചു. മാവോയിസ്റ്റ് ആശയങ്ങളില് വഴിതെറ്റിപ്പോയ പ്രവര്ത്തകരെ സമൂഹത്തിന്റെ മുഖ്യധാരയില് എത്തിക്കുന്നതിനാണ് പദ്ധതി. ആയുധങ്ങള് സമര്പ്പിച്ച് കീഴടങ്ങുന്നവര്ക്ക് 35,000 രൂപ വരെ പാരിതോഷികവും പ്രഖ്യാപിച്ചിട്ടുണ്ട്.
ഇത് കൂടാതെ കേരള സര്ക്കാറിന്റെ ഭവന നയം പ്രകാരം വീട് അനുവദിക്കാനും പദ്ധതിയുണ്ട്. ജില്ല പൊലീസ് മേധാവിയുടെ ആസ്ഥാനത്ത് നടന്ന പൊലീസ് ഉദ്യോഗസ്ഥരുടെ യോഗത്തിന് ശേഷമാണ് ലുക്ക് ഔട്ട് നോട്ടീസ് പുറത്തുവിട്ടത്. വയനാട് കമ്പമലയില് തുടരെയുള്ള മാവോയിസ്റ്റ് ആക്രമണങ്ങള് പ്രദേശവാസികളുടെ ജീവന് ഭീഷണിയാകുന്ന സാഹചര്യം കണക്കിലെടുത്താണ് ലുക്ക് ഔട്ട് നോട്ടീസ് പുറത്തിറക്കിയത്.