ന്യൂനപക്ഷങ്ങളെ ഒറ്റുകൊടുത്ത ചരിത്രം മാത്രമേയുള്ളു സംഘപരിവാറിനെന്നു കുറ്റപ്പെടുത്തി കെപിസിസി പ്രസിഡന്റ് കെ സുധാകരന് എംപി. ലോക്സഭാ തെരഞ്ഞെടുപ്പിനു മുന്നോടിയായി ക്രൈസ്തവരെ സന്ദര്ശിക്കുന്ന ബിജെപിയുടേത് സ്നേഹയാത്രയല്ലെന്നും മുപ്പതുവെള്ളിക്കാശിന് യേശുവിനെ ഒറ്റിക്കൊടുത്ത യൂദാസിന്റെ ചുംബനമാണെന്നും സുധാകരൻ വിമർശിച്ചു.
കുരിശുമല കയറിയും ക്രിസ്മസ് കേക്കുമായി വീടുകളില് കയറിയിറങ്ങിയും ക്രൈസ്തവരെ പാട്ടിലാക്കാന് ഓടിനടന്ന കേരളത്തിലെ ബിജെപിക്കാര് മണിപ്പൂരില് ക്രിസ്ത്യാനികളുടെ കൂട്ടക്കൊല നടന്നപ്പോള് ഓടിയൊളിച്ച് ആട്ടിന്തോലിട്ട ചെന്നായുടെ തനിസ്വരൂപം പ്രദര്ശിപ്പിച്ചു. മണിപ്പൂരിലും രാജ്യവ്യാപകമായും ക്രൈസ്തവര്ക്കെതിരേ സംഘപരിവാരങ്ങളുടെ ആക്രമണം തുടരുന്നതിനിടയിലാണ് കേരളത്തില് മാത്രം അവര് വീണ്ടും സ്പെഷ്യല് ന്യൂനപക്ഷപ്രേമം വിളമ്പുന്നതെന്ന് സുധാകരൻ പറഞ്ഞു.
7 മാസമായി മണിപ്പൂര് കത്തിയെരിഞ്ഞിട്ടും നൂറുകണക്കിനു പേരെ കൊന്ന് കുക്കി ,ഗോത്രവര്ഗ, ക്രിസ്ത്യന് സമൂഹത്തെ വേട്ടയാടിയിട്ടും പ്രധാനമന്ത്രി അതീവഗൗരവമുള്ള ഈ വിഷയത്തില് ഇടപെട്ടില്ല. മണിപ്പൂരില് സ്നേഹയാത്രയുമായി രാഹുല് ഗാന്ധി എത്തിയതോടെയാണ് വിഷയം ദേശീയശ്രദ്ധയില് വന്നത്. ഡീന് കുര്യാക്കോസ് എംപി, ഹൈബി ഈഡന് എന്നിവരാണ് അവിടെ ആദ്യം കാലുകുത്തിയതെന്നും സുധാകരൻ വ്യക്തമാക്കി.
ബിജെപി മുഖ്യമന്ത്രി ബിരേന് സിംഗ് ഭരണമേറ്റ 2017 മുതലാണ് മണിപ്പൂര് കലാപഭരിതമായത്. മണിപ്പൂരില് നടക്കുന്നത് കേന്ദ്ര-സംസ്ഥാന സര്ക്കാരുകളുടെ പിന്തുണയോടെ നടക്കുന്ന ആസൂത്രിതമായ വംശഹത്യയാണ്. ഗുജറാത്തില് നടന്ന വംശഹത്യയ്ക്കു സമാനമാണിതെന്നും സുധാകരൻ കുറ്റപ്പെടുത്തി.മണിപ്പൂരിലും രാജ്യത്തിന്റെ മറ്റു ഭാഗങ്ങളിലും നടക്കുന്ന അക്രമങ്ങളില്നിന്ന് കേരളത്തിന് വലിയ പാഠങ്ങള് ഉള്ക്കൊള്ളാനുണ്ട്. ബിജെപിക്ക് നില്ക്കാനൊരിടം കിട്ടിയാല് ഒട്ടകത്തിന് തലചായ്ക്കാന് ഇടംകൊടുത്തതുപോലെ ആകുന്നതാണ് ചരിത്രമെന്ന് സുധാകരന് പറഞ്ഞു.