നെയ്യാറ്റിൻകരയിൽ ആത്മഹത്യ ചെയ്ത രാജനെതിരെ കോടതിവിധി തടസ്സപ്പെടുത്തിയതിനും ആത്മഹത്യയ്ക്കും കേസെടുത്ത കേരള പൊലീസിന്റെ നടപടി അങ്ങേയറ്റം മനുഷ്യത്വരഹിതമാണെന്ന് പ്രതിപക്ഷ നേതാവ് രമേശ് ചെന്നിത്തല.
പൊലീസിന്റെ ദുഷ് ചെയ്തികൾ മാധ്യമങ്ങൾക്ക് മുന്നിലും പൊതുസമൂഹത്തിനു മുന്നിലും തുറന്നു കാണിച്ചത് രാജന്റെയും അമ്പിളിയുടെയും രണ്ട് ആൺമക്കൾ ചേർന്നാണ്. അവരുടെ മനോവീര്യം തകർത്തു കളയാനാണ് മരിച്ച രാജനെതിരെ പൊലീസ് വീണ്ടും കേസെടുക്കുന്നത്. പൊലീസ് സേനയ്ക്കും ഈ നാടിനാകെയും അപമാനമാണ് ഈ നടപടി എന്ന് രമേശ് ചെന്നിത്തല അഭിപ്രായപ്പെട്ടു.
മാതാപിതാക്കളുടെ മരണത്തിനു ശേഷം ആ രണ്ട് ആൺമക്കൾക്ക് ജീവിതം കെട്ടിപ്പടുക്കുന്നതിന് അവസരം നൽകുന്നതിനു പകരം അവരുടെ മാതാപിതാക്കൾക്കെതിരെ അന്യായമായി കേസെടുത്ത് ക്രൂരതയുടെ മറ്റൊരു മുഖം വെളിപ്പെടുത്തുകയാണ് കേരള പൊലീസ് എന്നും പ്രതിപക്ഷ നേതാവ് പറഞ്ഞു.