മുതിര്ന്ന കോണ്ഗ്രസ് നേതാവും മുന് മന്ത്രിയുമായിരുന്ന ആര്യാടന് മുഹമ്മദിന്റെ നിര്യാണത്തില് ഗവര്ണര് ആരിഫ് മുഹമ്മദ് ഖാന് അനുശോചിച്ചു. പുരോഗമനപരവും മതേതരവുമായ സമീപനവും ജനഹിതം നന്നായി അറിഞ്ഞുള്ള പ്രവര്ത്തനവും കൊണ്ട് സര്വരുടെയും ആദരം നേടിയ നേതാവായിരുന്നു അദ്ദേഹമെന്ന് ഗവര്ണര് അനുസ്മരിച്ചു.
മതനിരപേക്ഷ നിലപാടുകള് ഉയര്ത്തിപ്പിടിച്ച ശ്രദ്ധേയനായ നിയമസഭാ സാമാജികനായിരുന്നു ആര്യാടനെന്ന് മുഖ്യമന്ത്രി പിണറായി വിജയന് പറഞ്ഞു. ഇടതുപക്ഷവുമായി യോജിച്ചും വിയോജിച്ചും പ്രവര്ത്തിച്ച രാഷ്ട്രീയ പശ്ചാത്തലം അദ്ദേഹത്തിനുണ്ടായിരുന്നു. ശ്രദ്ധേയനായ നിയമസഭാ സാമാജികനായിരുന്നു.
മതനിരപേക്ഷ നിലപാടുകള് ഉയര്ത്തിപ്പിടിക്കുന്നതിന് എന്നും അദ്ദേഹം തയ്യാറായിരുന്നു. തന്റെ വാദമുഖങ്ങള് ശക്തമായി നിയമസഭയില് അവതരിപ്പിക്കുന്നതില് മികവ് പുലര്ത്തിയിരുന്ന സാമാജികനായിരുന്നു ആര്യാടന് മുഹമ്മദ് എന്ന് മുഖ്യമന്ത്രി അനുശോചന സന്ദേശത്തില് പറഞ്ഞു.
കോഴിക്കോട്ടെ സ്വകാര്യ ആശുപത്രിയില് ചികിത്സയിലിരിക്കെ ഞായറാഴ്ച രാവിലെ 7.40നായിരുന്നു ആര്യാടന് മുഹമ്മദിന്റെ അന്ത്യം. ഒരാഴ്ചയായി ചികിത്സയിലായിരുന്നു. സംസ്കാരം നാളെ രാവിലെ ഒന്പതിന് നിലമ്പൂരില്.
1977, 1980, 1987, 1991, 1996, 2001, 2006, 2011 എന്നീ വര്ഷങ്ങളില് നിലമ്പൂര് നിയമസഭാമണ്ഡലത്തില് നിന്ന് കേരള നിയമസഭയിലേക്ക് തിരഞ്ഞെടുക്കപ്പെട്ടു. 1980-82 കാലത്ത് ഇ.കെ. നായനാര് മന്ത്രിസഭയിലെ തൊഴില്, വനം മന്ത്രിയായിരുന്നു. ഒമ്പതാം നിയമസഭയിലെ എ.കെ. ആന്റണി മന്ത്രിസഭയില് തൊഴില്, ടൂറിസം മന്ത്രിയായും ഉമ്മന് ചാണ്ടി മന്ത്രിസഭയില് (2004-06) വൈദ്യുതിമന്ത്രിയായും പ്രവര്ത്തിച്ചിട്ടുണ്ട്.