രാജ്യത്ത് ജനങ്ങള്‍ക്ക് ഇരുട്ടടിയായി ഇന്നും ഇന്ധന വില വര്‍ദ്ധിപ്പിച്ചു. പെട്രോള്‍ ലിറ്ററിന് 88 പൈസയും, ഡീസലിന് 84 പൈസയുമാണ് വര്‍ദ്ധിപ്പിച്ചത്. കഴിഞ്ഞ ഒമ്പത് ദിവസത്തിനിടെ എട്ട് തവണയാണ് പെട്രോള്‍ ഡീസല്‍ വില ഉയര്‍ത്തുന്നത്.
ഈ മാസം 23ാം തിയതി മുതലുള്ള കണക്കെടുത്താല്‍ ഇതുവരെ 6 രൂപ 10 പൈസയാണ് പെട്രോളിന് കൂടിയത്. ഡീസലിന് അഞ്ച് രൂപ 86 പൈസയും ഒരാഴ്ചക്കിടെ കൂടി.
നിലവില്‍ കൊച്ചിയില്‍ പെട്രോളിന് 110 രൂപ 3 പൈസയും ഡീസലിന് 97 രൂപ 33 പൈസയുമായി. കോഴിക്കോട് പെട്രോള്‍ വില 110 രൂപ 58 പൈസയും, ഡീസല്‍ വില 97 രൂപ 61 പൈസയുമാണ്. തിരുവനന്തപുരത്തും പെട്രോള്‍ വില 112 രൂപ 47 പൈസയായി ഉയര്‍ന്നു. ഡീസലിന് 98 രൂപ 93 പൈസയായി.
രാജ്യത്ത് അഞ്ച് സംസ്ഥാനങ്ങളിലെ തിരഞ്ഞെടുപ്പിനോട് അനുബന്ധിച്ച് നവംബര്‍ 4 മുതല്‍ ഇന്ധന വില കൂട്ടുന്നത് നിര്‍ത്തി വച്ചിരുന്നു. കഴിഞ്ഞ ചൊവ്വാഴ്ച മുതലാണ് വീണ്ടും വില കൂട്ടാന്‍ തുടങ്ങിയത്. തുടര്‍ച്ചയായി വില ഉയര്‍ത്താന്‍ തന്നെയാണ് എണ്ണക്കമ്പനികളുടെ തീരുമാനം. ഇന്ധനവില ഉയരുന്നതോടെ മറ്റ് അവശ്യവസ്തുക്കള്‍ക്കും വില ഉയരും.
