നിയമസഭാ തിരഞ്ഞെടുപ്പില് സമദൂര നിലപാടില് മാറ്റമില്ലെന്ന് എൻഎസ്എസ് ജനറല് സെക്രട്ടറി ജി സുകുമാരന് നായര്. ശരിദൂരം ശബരിമല വിഷയത്തില് മാത്രമെന്ന് പറഞ്ഞ ജി സുകുമാരന് നായര് ശബരിമല സ്വര്ണക്കൊള്ളയുമായി ബന്ധപ്പെട്ട നിലപാട് നേരത്തെ വ്യക്തമാക്കിയതെന്നും പറഞ്ഞു. നിലവിൽ ശബരിമല സ്വര്ണക്കൊള്ള വിഷയത്തില് പ്രതികരിക്കാനില്ലെന്നും എന്എസ്എസ് ജനറല് സെക്രട്ടറി പറഞ്ഞു.
149-ാത് മന്നം ജയന്തിയോടനുബന്ധിച്ച് എന്എസ്എസ് ആസ്ഥാനത്ത് വന് ആഘോഷ പരിപാടികളാണ് നടക്കുന്നത്. മന്നം സമാധി പ്രമുഖര് സന്ദര്ശിച്ചു. ശരിദൂരം എന്നത് ശബരിമല വിഷയത്തില് മാത്രമാണ്. അതിനെ രാഷ്ട്രീയമാടി കൂട്ടിക്കുഴയ്ക്കേണ്ട കാര്യമില്ല. ആ വിഷയത്തില് എന്എസ്എസിന് ശരിദൂര നിലപാടാണ്. ബാക്കി എല്ലാ കാര്യത്തിലും സമദൂര നിലപാട് ആണെന്നും സുകുമാരന് നായര് പറഞ്ഞു.
മന്നം ജയന്തി ആഘോഷത്തിന്റെ ഭാഗമായി നടന്ന പ്രതിനിധി സമ്മേളനത്തില് സര്ക്കാരിനെ പ്രശംസിച്ചിരുന്നു. സുകുമാരന് നായര് അവതരിപ്പിച്ച റിപ്പോര്ട്ടില് ശബരിമല വിഷയം വിശദമായി തന്നെ പരാമര്ശിക്കുന്നുണ്ട്. ശബരിമലയില് നിലവിലെ സര്ക്കാര് നിലപാട് മാറ്റിയത് ജനവികാരം മാനിച്ചാണ്. ഇപ്പോള് ആചാരങ്ങള് പാലിച്ചുകൊണ്ട് ഭക്തര്ക്ക് ദര്ശനം നടത്താന് അവസരം ഒരുക്കുന്നു. ഈ നിലപാട് മാറ്റത്തില് വിശ്വാസികള് സന്തോഷിക്കുന്നുണ്ടെന്ന് സുകുമാരന് നായര് അവതരിപ്പിച്ച റിപ്പോര്ട്ടില് പറയുന്നു.