പാർലമെന്റ് തിരഞ്ഞെടുപ്പ് മുന്നിൽ കണ്ട് പാർട്ടിയെ കൂടുതൽ ശക്തിപ്പെടുത്താൻ തീരുമാനിച്ച് കോൺഗ്രസ്. ഇതിന്റെ ഭാഗമായി കോൺഗ്രസിന്റെ ലീഡേഴ്സ് മീറ്റ് ഇന്ന് വയനാട്ടിൽ ചേരും. രണ്ടു ദിവസത്തേക്കാണ് യോഗം ചേരുന്നത്. കെപിസിസി ഭാരവാഹികളും രാഷ്ട്രീയകാര്യ സമിതി അംഗങ്ങളും ഡിസിസി അദ്ധ്യക്ഷന്മാരും പങ്കെടുക്കുമെന്നാണ് വിവരം.
നിലവിലെ രാഷ്ട്രീയ സാഹചര്യങ്ങളെയും, സംഘടനാ കാര്യങ്ങളേയും പരിഗണിച്ചുള്ള ചർച്ചകളാണ് പ്രധാന അജണ്ട. കോഴിക്കോട് നടന്ന ചിന്തൻ ശിബിരത്തിലെ തീരുമാനങ്ങൾ പലതും നടപ്പായില്ലെന്ന വിമർശനം പാർട്ടിക്കുള്ളിൽ ഉയരുന്ന പശ്ചാത്തലത്തിലാണ് രണ്ടാം ചിന്തൻ ശിബിരത്തിന് സമാനമായ ലീഡേഴ്സ് മീറ്റ് നടക്കുന്നത്.
നിലവിലെ രാഷ്ട്രീയ സാഹചര്യം കോൺഗ്രസിന് അനുകൂലമാണെന്ന വിലയിരുത്തലിൽ, ജനങ്ങളിലേക്ക് കൂടുതൽ അടുക്കുവാനുള്ള പദ്ധതികളാവും യോഗം ആലോചിക്കുക. സംഘടനാ ചുമതലയുള്ള എഐസിസി ജനറൽ സെക്രട്ടറി കെ.സി വേണുഗോപാൽ കേരളത്തിന്റെ ചുമതലയുള്ള ജനറൽ സെക്രട്ടറി താരിഖ് അൻവർ എന്നിവർ ചർച്ചകളിൽ പങ്കെടുക്കും.