എന്സിപി എംഎല്എ തോമസ് കെ തോമസുമായി ബന്ധപ്പെട്ട് ഉയര്ന്നുവന്ന കോഴ വിവാദത്തില് അന്വേഷണത്തിന് നാലംഗ കമ്മീഷന്. എന്സിപി സംസ്ഥാന പ്രസിഡന്റ് പിസി ചാക്കോയാണ് നാലംഗ കമ്മീഷനെ നിയമിച്ചത്. അന്വേഷണം നടത്തി പത്ത് ദിവസത്തിനുള്ളില് വിഷയത്തില് റിപ്പോര്ട്ട് സമര്പ്പിക്കാനാണ് നിര്ദ്ദേശം.
എന്സിപി സംസ്ഥാന പ്രസിഡന്റുമാരായ അഡ്വ പിഎം സുരേഷ് ബാബു, ലതികാ സുഭാഷ്, അച്ചടക്ക സമിതി ചെയര്മാനും ജനറല് സെക്രട്ടറിയുമായ പ്രൊഫ ജോബ് കാട്ടൂര്, സംസ്ഥാന സംഘടനാ ജനറല് സെക്രട്ടറി അഡ്വ കെആര് രാജന് എന്നിവരാണ് നാലംഗ സമിതിയിലുള്ളത്. തോമസ് കെ തോമസ് എംഎല്എ എന്സിപി അജിത് പവാര് പക്ഷത്ത് ചേരാന് ആന്റണി രാജുവിനും കോവൂര് കുഞ്ഞുമോനും 50 കോടി വീതം വാഗ്ദാനം ചെയ്തുവെന്നാണ് ആരോപണം.
പരാതി മുഖ്യമന്ത്രി സിപിഎം സെക്രട്ടറിയേറ്റ് യോഗത്തില് റിപ്പോര്ട്ട് ചെയ്തു. തോമസ് കെ തോമസിന്റെ മന്ത്രിസ്ഥാനം സംബന്ധിച്ച ചര്ച്ചയിലാണ് മുഖ്യമന്ത്രി പരാതിയുടെ കാര്യം പരാമര്ശിച്ചത്. ആരോപണം പുറത്തുവന്നതിന് പിന്നാലെ എന്സിപി നേതൃയോഗവും വിഷയം ചര്ച്ച ചെയ്തുവെന്നാണ് പുറത്തുവരുന്ന റിപ്പോര്ട്ടുകള്.