നടി മാളവികയുടെ വീട്ടില് മോഷണം. നടിയുടെ പാലക്കാട് ഞാങ്ങാട്ടിരിയിലെ വീട്ടിലാണ് മോഷണം നടന്നത്. ഒന്നര ലക്ഷം രൂപ വില വരുന്ന വാച്ച് ഉള്പ്പെടെ വിലപിടിപ്പുള്ള സാധനങ്ങളാണ് കവര്ന്നത്. വീട്ടില് കള്ളന് കയറുന്നതിന്റെ ദൃശ്യങ്ങളാണ് ഇപ്പോള് സോഷ്യല് മീഡിയയില് പങ്കുവച്ചിരിക്കുകയാണ്.
വീടിന്റെ മുന് വാതില് കുത്തിപ്പൊളിച്ചാണ് കള്ളന് കയറിയത് എന്ന് മാളവികയുടെ ഭര്ത്താവും നടനുമായ തേജസ് സിസിടിവി ദൃശ്യം പങ്കുവച്ച് പറയുന്നത്. വസ്ത്രങ്ങളും മറ്റും വാരി വലിച്ചിട്ടു. കള്ളന് വീട്ടിലെ അലമാരയും പൊളിച്ചിട്ടുണ്ട്. ഞങ്ങള് സ്ഥലത്ത് ഉണ്ടിയിരുന്നെങ്കില് വലിയ അപകടമായേനെ എന്നും തേജസ് പറയുന്നുണ്ട്.
മാളവികയും കുടുംബവും വീട്ടില് ഇല്ലാതിരുന്ന സമയത്താണ് ഞാങ്ങാട്ടിരി വി കെ കടവ് റോഡിലെ വീട്ടില് മോഷണം നടന്നത്. രാവിലെ ജോലിക്കാരി എത്തി വീട് തുറന്നപ്പോഴാണ് മോഷണ വിവരം അറിയുന്നത്. കിടപ്പുമുറിയിലെയും അടുക്കളയിലെയും സാധനങ്ങള് വലിച്ചുവാരിയിട്ട നിലയിലാണ്.
പലതും പൊട്ടിച്ചിട്ടുമുണ്ട്. മാളവികയുടെ ഒന്നര ലക്ഷം രൂപ വിലവരുന്ന വാച്ചാണ് മോഷ്ടാവ് പ്രധാനമായും കവര്ന്നത്. സ്വര്ണ്ണവും പണവും വീട്ടില് വയ്ക്കാത്തതിനാല് നഷ്ടമായില്ല. ഡോഗ് സ്ക്വാഡ് സ്ഥലത്തെത്തി പരിശോധന നടത്തി. മാളവികയുടെ വീടിന് ചുറ്റും സഞ്ചരിച്ച നായ സമീപത്തെ മറ്റൊരു വീട്ടിലുമെത്തി.
പിന്നീട് അടുത്തുള്ള പുഴയോരത്തുള്ള ആളൊഴിഞ്ഞ പറമ്പിലെത്തി നിന്നു. മോഷ്ടാവ് വീട് കുത്തിത്തുറക്കാന് ഉപയോഗിച്ച ഇരുമ്പ് ദണ്ഡും, ഉളിയും വീടിന്റെ പരിസരത്ത് ഉപേക്ഷിച്ച നിലയില് കണ്ടെത്തിയിട്ടുണ്ട്. റെയിന് കോട്ട് ധരിച്ച് മുഖം തോര്ത്ത് ഉപയോഗിച്ച് മറച്ച മോഷ്ടാവിന്റെ ദൃശ്യങ്ങള് അടുത്ത വീട്ടിലെ സിസിടിവി ക്യാമറയില് പതിഞ്ഞിട്ടുണ്ട്.