ദുൽഖർ സൽമാൻ പ്രധാന കഥാപാത്രത്തിലെത്തുന്ന തെലുങ്ക് ചിത്രം സീതാ രാമത്തിലെ ഗാനം പുറത്തിറങ്ങി. ഓ പ്രേമാ എന്നാരംഭിക്കുന്ന ഗാനമാണ് അണിയറപ്രവർത്തകർ പുറത്ത് വിട്ടത്. കൃഷ്ണകാന്ത് വരികൾ എഴുതിയിരിക്കുന്ന ഗാനത്തിന് സംഗീതം പകർന്നിരിക്കുന്നത് വിശാൽ ചന്ദ്രശേഖർ ആണ്. കപിൽ കപിലനും ചിന്മയി ശ്രീപാദയും ചേർന്നാണ് ഗാനമാലാപിച്ചിരിക്കുന്നത്.
തെലുങ്കിനൊപ്പം മലയാളം, തമിഴ് പതിപ്പുകളും പ്രദർശനത്തിന് എത്തുന്ന ചിത്രമാണിത്. ഈ മൂന്ന് ഭാഷകളിലും പുതിയ ഗാനം പുറത്തിറക്കിയിട്ടുണ്ട്. തിരികേ വാ എന്നാണ് മലയാള ഗാനത്തിൻറെ തുടക്കം. 1965ലെ ഇൻഡോ- പാക് യുദ്ധത്തിൻറെ പശ്ചാത്തലത്തിൽ കഥ പറയുന്ന ചിത്രമാണിത്. സീതാ രാമം ഒരു ഹിസ്റ്റോറിക്കൽ ഫിക്ഷനും പ്രണയകഥയുമാണെന്ന് ചിത്രത്തിൻറെ ഇതിവൃത്തനെന്ന് സംവിധായകൻ വ്യക്തമാക്കിയിരുന്നു.
ഹനു രാഘവപ്പുടിയാണ് ചിത്രത്തിൻറെ സംവിധാനം. മഹാനടിക്കു ശേഷം ദുൽഖറിൻറേതായി എത്തുന്ന തെലുങ്ക് ചിത്രമാണിത്. കശ്മീരിൽ സേവനത്തിലുള്ള ഒരു സൈനികോദ്യോഗസ്ഥനാണ് ദുൽഖറിൻറെ കഥാപാത്രം. ലഫ്റ്റനൻറ് റാം എന്നാണ് കഥാപാത്രത്തിൻറെ പേര്. ദുൽഖർ റാം ആവുമ്പൊൾ സീത എന്ന നായികാ കഥാപാത്രമായി എത്തുന്നത് മൃണാൾ ഥാക്കൂർ ആണ്.
ദുൽഖറിനുവേണ്ടി എഴുതപ്പെട്ട കഥാപാത്രമാണ് റാം എന്നും മറ്റൊരു നടനെയും ആലോചിച്ചില്ലെന്നും ഹനു രാഘവപ്പുഡി നേരത്തെ പറഞ്ഞിരുന്നു. രാശ്മിക മന്ദാനയും സുമന്ദും പ്രധാന കഥാപാത്രങ്ങളെ അവതരിപ്പിക്കുന്നുണ്ട് ചിത്രത്തിൽ.