തെന്നിന്ത്യൻ സൂപ്പർ സ്റ്റാർ രജനികാന്ത് തിരുവനന്തപുരത്തേക്ക് വരുന്നു. ജയ് ഭീം എന്ന ചിത്രത്തിന് ശേഷം ടി. ജെ ജ്ഞാനവേൽ സംവിധാനം ചെയ്യുന്ന പുതിയ ചിത്രമായ തലൈവർ170 ന്റെ ചിത്രീകരണത്തിനായാണ് രജനികാന്ത് തലസ്ഥാനത്ത് എത്തുന്നത്.
ഒക്ടോബർ 3 ന് വന്ന് പത്ത് ദിവസത്തോളം തിരുവനന്തപുരത്ത് ഉണ്ടാവുമെന്നാണ് വിവരം. രജനികാന്തിന്റെ കൂടെ മഞ്ജു വാര്യരും ഫഹദ് ഫാസിലും ഉണ്ടാവും. കോവളത്തെ ഒരു പഞ്ചനക്ഷത്ര ഹോട്ടലിലായിരിക്കും താമസം. വെള്ളായണി കാർഷിക കോളേജിലും ശംഖുമുഖത്തെ ഒരു വീട്ടിലുമായാണ് ‘തലൈവർ 170’ ന്റെ കേരളത്തിലുള്ള ചിത്രീകരണം.
അമിതാബ് ബച്ചൻ, മഞ്ജു വാര്യർ, ഫഹദ് ഫാസിൽ, റാണ ദഗുബാട്ടി തുടങ്ങീ വമ്പൻ താരനിരയാണ് ചിത്രത്തിലുള്ളത്. അമിതാഭ് ബച്ചനും രജനികാന്തും 32 വർഷത്തിന് ശേഷം ഒരുമിക്കുന്ന ചിത്രം കൂടിയാണ് തലൈവർ 170. എന്നാൽ അമിതാഭ് ബച്ചന്റെ രംഗങ്ങൾ തിരുവനന്തപുരത്ത് ഷൂട്ട് ചെയ്യില്ലെന്നാണ് അറിയാൻ കഴിഞ്ഞത്. ചിത്രത്തിൽ ഒരു പൊലീസ് ഓഫീസറുടെ വേഷത്തിലാണ് രജനികാന്ത് എത്തുന്നത്. അതേ സമയം ചിത്രത്തിൽ രജനിയുടെ വില്ലനായാണ് ഫഹദ് ഫാസിൽ എത്തുന്നതെന്നാണ് പുറത്തുവരുന്ന റിപ്പോർട്ടുകൾ.
ലൈക്ക പ്രൊഡക്ഷൻസിന്റെ ബാനറിൽ സുഭാസ്ക്കരനാണ് ചിത്രത്തിന്റെ നിർമ്മാണം. ബിഗ് ബഡ്ജറ്റിൽ ഒരുങ്ങുന്ന ചിത്രത്തിന് അനിരുദ്ധ് രവിചന്ദറാണ് സംഗീതം നൽകുന്നത്. രജനിയുടെ വരവുമായി ബന്ധപ്പെട്ട് വമ്പൻ സുരക്ഷാ സംവിധാനങ്ങളാണ് തലസ്ഥാനത്ത് ഒരുക്കിയിരിക്കുന്നത്.