റിലീസ് ചെയ്ത് മൂന്നു ദിവത്തിനുള്ളില്‍ ഏറ്റവും കൂടുതല്‍ കളക്ഷന്‍ നേടുന്ന ചിത്രമായി മണിരത്‌നത്തിന്റെ ‘പൊന്നിയിന്‍ സെല്‍വന്‍ 1’. ചിത്രം ഇരുന്നൂറ് കോടി ക്ലബ്ബില്‍ ഇടം നേടി. റിലീസ് ചെയ്ത് മൂന്ന് ദിവസങ്ങള്‍ പിന്നിടുമ്പോള്‍ 202.87 കോടിയാണ് ചിത്രത്തിന്റെ ആഗോള കളക്ഷന്‍.
മൂന്ന് ദിവസം കൊണ്ട് ആഗോള ബോക്‌സോഫീസില്‍ ഏറ്റവും കൂടുതല്‍ കളക്ഷന്‍ നേടിയ തമിഴ് സിനിമകളുടെ ലിസ്റ്റില്‍ ഒന്നാം സ്ഥാനത്താണ് പൊന്നിയിന്‍ സെല്‍വന്‍. രണ്ടാമത്തെ ചിത്രം കമല്‍ഹാസന്റെ ‘വിക്രം’ ആണ്. 125.57 കോടിയാണ് ചിത്രത്തിന്റെ കളക്ഷന്‍. മൂന്നാം സ്ഥാനത്ത് അജിത്ത് ചിത്രം ‘വലിമൈ’ ആണ്.
അതേസമയം, മികച്ച ഓപ്പണിംഗ് ആണ് സിനിമയ്ക്ക് ലഭിച്ചത്. 78.29 കോടിയായിരുന്നു സിനിമയുടെ ആദ്യ ദിന കളക്ഷന്‍. കേരളത്തിലും ചിത്രത്തിന് മികച്ച സ്വീകാര്യതയാണ് ലഭിക്കുന്നത്. ആദ്യ ദിനത്തില്‍ 3.70 കോടി നേടിയ ചിത്രം, രണ്ടാം ദിനത്തില്‍ മൂന്ന് കോടിയിലധികം കളക്ഷന്‍ സ്വന്തമാക്കി.
ഇതിഹാസ സാഹിത്യകാരന്‍ കല്‍ക്കി കൃഷ്ണമൂര്‍ത്തിയുടെ ‘പൊന്നിയിന്‍ സെല്‍വന്‍’ എന്ന നോവലിനെ ആസ്പദമാക്കിയാണ് മണിരത്‌നം സിനിമ ഒരുക്കിയത്. പൊന്നിയിന്‍ സെല്‍വന്റെ രണ്ടാം ഭാഗം ഒമ്പത് മാസത്തിനുള്ളില്‍ റിലീസ് ചെയ്യുമെന്ന് മണിരത്‌നം വ്യക്തമാക്കിയിരുന്നു. 2023ല്‍ സിനിമ എത്തും.