തലൈവര് രജനികാന്തിനൊപ്പമുള്ള ചിത്രവുമായി പൊതുമരാമത്ത് ടൂറിസം മന്ത്രി പിഎ മുഹമ്മദ് റിയാസ്. രജനികാന്തിന്റെ ഭാഷ എന്ന ചിത്രത്തിലെ ‘നാന് ഒരു തടവ സൊന്നാ, നൂറ് തടവ് സൊന്ന മാതിരി’ എന്ന സൂപ്പര് ഹിറ്റ് ഡയലോഗ് ആണ് മന്ത്രി ചിത്രത്തിനൊപ്പം ക്യാപ്ഷനായി കുറിച്ചിരിക്കുന്നത്. കോഴിക്കോട് ‘ജയിലര് 2’വിന്റെ ചിത്രീകരണ തിരക്കുകളിലാണ് രജനി ഇപ്പോള്.
പിണറായി സര്ക്കാരിന്റെ നാലാം വാര്ഷികത്തിന്റെ ഭാഗമായി കോഴിക്കോട് ജില്ലാതല യോഗത്തില് പങ്കെടുക്കാനായാണ് മുഹമ്മദ് റിയാസ് കോഴിക്കോട് എത്തിയത്. അതേസമയം, പാലക്കാട് അട്ടപ്പാടിയിലെ ഷെഡ്യൂള് പൂര്ത്തിയാക്കിയ ശേഷമാണ് ജയിലര് 2വിന്റെ ഷൂട്ടിങ്ങിനായി നടന് കോഴിക്കോട് എത്തിയത്.
നെല്സണ് ചിത്രത്തിന്റെ ഷൂട്ടിങ്ങിനായി ആറ് ദിവസമാണ് താരം കോഴിക്കോട് ഉണ്ടാവുക. രാമനാട്ടുകര കടവ് റിസോര്ട്ടിലാണ് താമസം. 2023ല് ആയിരുന്നു ‘ജയിലര്’ റിലീസ് ചെയ്തത്. ആഗോള ബോക്സ് ഓഫിസില് നിന്ന് 600 കോടിയിലേറെ ചിത്രം വാരി. ചിത്രത്തിലെ വിനായകന്റെ വില്ലന് വേഷവും ശ്രദ്ധേയമായിരുന്നു.
അനിരുദ്ധ് രവിചന്ദര് തന്നെയാണ് സംഗീതം നിര്വഹിക്കുന്നത്. ജയിലറിലെ താരങ്ങള്ക്കൊപ്പം പുതിയ കുറച്ച് ആളുകളും ഇത്തവണ എത്തുന്നുണ്ട്. മോഹന്ലാല്, ശിവരാജ്കുമാര്, ജാക്കി ഷ്രോഫ് തുടങ്ങിയവരും രണ്ടാം ഭാഗത്തില് അണിനിരക്കുന്നു. തെലുങ്ക് സൂപ്പര്താരം ബാലകൃഷ്ണയും കാമിയോ റോളിലെത്തും. സുരാജ് വെഞ്ഞാറമ്മൂട് ആകും ഇത്തവണ വില്ലനായി എത്തുക.