തെലുങ്ക് സൂപ്പര് താരം നന്ദമൂരി ബാലകൃഷ്ണ സൂപ്പര് ഹീറോ ആകാന് ഒരുങ്ങുന്നു. തന്റെ 109-ാം ചിത്രത്തിലാണ് ബാലയ്യ സൂപ്പര് ഹീറോ റോളില് എത്താനൊരുങ്ങുന്നത്. സംഗീതസംവിധായകന് ജേക്സ് ബിജോയ് ആണ് ഇതിനെ കുറിച്ചുള്ള അപ്ഡേറ്റ് പുറത്തുവിട്ടത്. ചിത്രത്തിന് സംഗീതം ഒരുക്കുന്നത് ജേക്സ് ബിജോയ് ആണ്.
‘മാസ് സൂപ്പര് ഹീറോ ഓണ് ദ വേ’ എന്നാണ് ചിത്രത്തിനെ കുറിച്ച് ജേക്സ് എക്സില് കുറിച്ചത്. ബോബി കൊല്ലി സംവിധാനം ചെയ്യുന്ന ചിത്രത്തിന്റെ പേര് അടുത്ത ദിവസം പുറത്തുവിടും. ‘ഡാക്കു മഹാരാജ്’ എന്നായിരിക്കും ചിത്രത്തിന്റെ പേര് എന്നാണ് റിപ്പോര്ട്ടുകള്. എന്നാല് ഇത് ഔദ്യോഗിക റിപ്പോര്ട്ടുകളല്ല.
നിലവില് എന്ബികെ 109 എന്ന് താല്ക്കാലികമായി പേരിട്ടിരിക്കുന്ന ചിത്രത്തില് ബോബി ഡിയോള് ആണ് വില്ലന് വേഷത്തില് എത്തുന്നത്. ചാന്ദിനി ചൗധരി, ഗൗതം വാസുദേവ് മേനോന്, രവി കിഷന്, ജഗപതി ബാബു, ഷൈന് ടോം ചാക്കോ എന്നിവരും ചിത്രത്തില് പ്രധാന കഥാപാത്രങ്ങളെ അവതരിപ്പിക്കുന്നുണ്ട്.
നിധി അഗര്വാള് ആണ് ചിത്രത്തിലെ നായിക. നവംബര് ആദ്യ വാരത്തോടെ ചിത്രീകരണം പൂര്ത്തിയാക്കുന്ന ചിത്രം 2025 ജനുവരി 12ന് സംക്രാന്തി ദിനത്തില് റിലീസ് ചെയ്യാനാണ് പദ്ധതി. അതേസമയം, 64-ാം വയസില് ബാലയ്യ സൂപ്പര് ഹീറോ ആകുന്നതിനെ പരിഹസിച്ചു കൊണ്ടുള്ള പോസ്റ്റുകളും സോഷ്യല് മീഡിയയില് നടക്കുന്നുണ്ട്.