ബോക്സ് ഓഫീസ് റെക്കോര്ഡുകളില് ആധിപത്യം സ്ഥാപിച്ച് തിയേറ്ററുകളെ ഇളക്കി മറിച്ച ‘ലോക’ ഒടിടിയില് സ്ട്രീമിങ് ആരംഭിച്ചതോടെ റെഫറന്സുകള് ചര്ച്ചയാക്കുകയാണ് പ്രേക്ഷകര്. ലോകയിലെ മുകേഷ് റെഫറന്സ് കണ്ടുപിടിച്ചിരിക്കുകയാണ് സോഷ്യല് മീഡിയ ഇപ്പോള്. ‘ബ്രിട്ടോളി ലിമിറ്റഡ്’ എന്ന ക്യാപ്ഷനോടെ പങ്കുവച്ച വീഡിയോ ശ്രദ്ധ ചര്ച്ചയാവുകയാണ്.
ചിത്രത്തില് നസ്ലിന്റെ കഥാപാത്രത്തിന്റെ അച്ഛന് ഒരു സീനില് ഫോണിലൂടെ ഏത് കമ്പനിയുടെ ഇന്റര്വ്യൂ ആണെന്ന് ചോദിക്കുമ്പോള് നസ്ലിന് ബ്രിട്ടോളി ലിമിറ്റഡ് എന്ന് പറയുന്നുണ്ട്. ഇത് 1995ല് പുറത്തിറങ്ങിയ മുകേഷ് ചിത്രമായ ‘ശിപായി ലഹള’യുടെ റഫറന്സ് ആണെന്ന് കണ്ടെത്തിയിരിക്കുകയാണ് സോഷ്യല് മീഡിയ.
ചിത്രത്തില് ബ്രിട്ടോളി ലിമിറ്റഡ് എന്ന കമ്പനിയിലെ പ്യൂണ് ആണ് മുകേഷിന്റെ കഥാപാത്രമായ രാജേന്ദ്രന്. നാട്ടിലെ എല്ലാവരും മുകേഷിനെ കളിയാക്കി വിളിക്കുന്ന പേരാണ് ബ്രിട്ടോളി. ഇതുമായി ബന്ധപ്പെടുത്തി നിരവധി നര്മരംഗങ്ങള് സിനിമയിലുണ്ട്. വിനയന് സംവിധാനം ചെയ്ത ചിത്രമാണ് ശിപായി ലഹള.
മലയാളത്തിലെ ഏറ്റവും അധികം കളക്ഷന് നേടിയ ചിത്രമാണ് ലോക. 300 കോടിയാണ് ചിത്രം കളക്ട് ചെയ്തത്. ഡൊമിനിക് അരുണ് സംവിധാനം ചെയ്ത് ദുല്ഖര് സല്മാന്റെ വേഫറര് കമ്പനി നിര്മ്മിച്ച ഈ ചിത്രത്തില് കല്യാണി പ്രിയദര്ശന്, നസ്ലിന്, സാന്ഡി, അരുണ് കുര്യന്, ചന്ദു സലിംകുമാര്, നിഷാന്ത് സാഗര്, രഘുനാഥ് പാലേരി, വിജയരാഘവന്, നിത്യശ്രി, ശരത് സഭ എന്നിവരും പ്രധാന വേഷത്തിലെത്തിയിരുന്നു.