“ഫോറന്സിക്”, “ഭൂമിയിലെ മനോഹര സ്വകാര്യം”, “ലൗ എഫ്എം” എന്ന ചിത്രങ്ങളാണ് ഇന്ന് തിയേറ്ററുകളിലേക്ക് എത്തുന്നത്.
ഫോറന്സിക്:
ടൊവിനോ തോമസ് നായകനാകുന്ന ചിത്രമാണ് “ഫോറന്സിക്”. ചിത്രത്തില് സാമുവല് ജോണ് കാട്ടൂക്കാരന് എന്ന ഫോറന്സിക് ഉദ്യോഗസ്ഥനായാണ് ടൊവിനോ വേഷമിടുന്നത്. “സെവന്ത് ഡേ”യുടെ തിരക്കഥകൃത്ത് അഖില് പോള് അനസ് ഖാനൊപ്പം രചനയും സംവിധാനവും നിര്വഹിക്കുന്ന ചിത്രത്തില് ഈ ചിത്രത്തില് മംമ്ത മോഹന്ദാസാണ് നായിക. റിതിക സേവ്യര് ഐപിഎസ് എന്ന കഥാപാത്രമായാണ് മംമ്ത എത്തുന്നത്. സൈജു കുറുപ്പ്, ധനേഷ് ആനന്ദ് ഗിജു ജോണ്, റേബ മോണിക്ക ജോണ് തുടങ്ങിയവരാണ് ചിത്രത്തിലെ മറ്റു താരങ്ങള്. സിജു മാത്യു, നെവിസ് സേവ്യര് എന്നിവരുടെ ജുവിസ് പ്രൊഡക്ഷന്സും രാജു മല്യത്തിന്റെ രാഗം മൂവീസും ചേര്ന്നാണ് ചിത്രം നിര്മിക്കുന്നത്.
ഭൂമിയിലെ മനോഹര സ്വകാര്യം:
ദീപക് പറമ്പൊലും പ്രയാഗ മാര്ട്ടിനും കേന്ദ്ര കഥാപാത്രങ്ങളാകുന്ന ചിത്രമാണ് “ഭൂമിയിലെ മനോഹര സ്വകാര്യം”. ഷൈജു അന്തിക്കാട് ഒരുക്കുന്ന ചിത്രം കാലിക പ്രസക്തിയുള്ള ഒരു പ്രണയകഥ ആധാരമാക്കിയാണ് ഒരുങ്ങുന്നത്. ലാല്, ഷൈന് ടോം ചാക്കോ, ഇന്ദ്രന്സ്, സുധീഷ്, അഭിഷേക് രവീന്ദ്രന്, അഞ്ജു അരവിന്ദ്, നിഷ സാരംഗ്, ഹരീഷ് പേരടി, സന്തോഷ് കീഴാറ്റൂര്, മഞ്ജു എന്നിങ്ങനെ നിരവധി അഭിനേതാക്കള് ചിത്രത്തില് അണിനിരക്കുന്നുണ്ട്. ബയോസ്കോപ് ടാകീസിന്റെ ബാനറില് രാജീവ്കുമാര് ആണ് ചിത്രം നിര്മ്മിക്കുന്നത്.
ലൗ എഫ്എം:
അപ്പാനി ശരത്തിനെ നായകനാക്കി ശ്രീദേവ് കപൂര് സംവിധാനം ചെയ്യുന്ന ചിത്രമാണ് “ലൗ എഫ്എം”. വ്യത്യസ്തമായ പ്രണയാനുഭവം ഇതിവൃത്തമായി വരുന്ന ഈ ചിത്രം രണ്ട് കാലഘട്ടത്തിലെ പ്രണയമാണ് അവതരിപ്പിക്കുന്നത്. ടിറ്റോ വില്സണ്, സിനോജ് അങ്കമാലി, ജിനോ ജോണ്, വിജിലേഷ്, നിര്മ്മല് പാലാഴി തുടങ്ങിയവരും ചിത്രത്തില് പ്രധാന കഥാപാത്രങ്ങളായി എത്തുന്നു. ജാനകി കൃഷ്ണന് , മാളവിക മേനോന്, എം 80 മൂസ ഫെയിം അഞ്ജു എന്നിവരാണ് നായികമാര്. പാലയ്ക്കല് തങ്ങള് എന്ന കഥപാത്രമായി നടന് ദേവനും ചിത്രത്തില് പ്രധാന വേഷത്തിലെത്തുന്നു. ബെന്സി പ്രൊഡക്ഷന്സിന്റെ ബാനറില് ബെന്സി നാസര് ആണ് ചിത്രം നിര്മ്മിക്കുന്നത്.
വെയില് മരങ്ങള്:
ഡോ. ബിജു സംവിധാനം “വെയില് മരങ്ങള്” എന്ന ചിത്രത്തില് ഇന്ദ്രന്സ് ആണ് പ്രധാന വേഷത്തിലെത്തുന്നത്. കേരളത്തില് നിന്ന് ഹിമാചലിലേക്ക് പലായനം ചെയ്യപ്പെട്ട ദളിത് കുടുംബത്തിന്റെ കഥയാണ് സിനിമയുടെ പ്രമേയം. ഇന്ദ്രന്സിനെ കൂടാതെ സരിത കുക്കു, കൃഷ്ണന് ബാലകൃഷ്ണന്, പ്രകാശ് ബാരെ, മാസ്റ്റര് ഗോവര്ധന്, അശോക് കുമാര്, നരിയാപുരം വേണു, മെല്വിന് വില്യംസ്, എന്നിവരും ചിത്രത്തിലുണ്ട്. ഷാങ്ഹായ് രാജ്യാന്തര ചലച്ചിത്രമേളയിലും “വെയില് മരങ്ങള്” പുരസ്കാരം നേടിയിരുന്നു. ഷാങ്ഹായ് മേളയില് പുരസ്കാരം നേടുന്ന ആദ്യ ഇന്ത്യന് ചിത്രം കൂടിയാണ് “വെയില് മരങ്ങള്”.