മലയാളത്തിലെ ആദ്യ സൂപ്പര്ഹീറോ ചിത്രം എന്ന വിശേഷണത്തോടെ എത്തുന്ന ‘മിന്നല് മുരളി’ നെറ്റ്ഫ്ലിക്സിലൂടെ റിലീസ് ചെയ്യും. വീക്കെന്ഡ് ബ്ലോക്ക് ബസ്റ്റേഴ്സിന്റെ ബാനറില് സോഫിയ പോള് നിര്മിച്ച ബിഗ് ബജറ്റ് ചിത്രം ബേസില് ജോസഫ് സംവിധാനം ചെയ്യുന്നു.
‘കാഴ്ചക്കാര്ക്ക് വൈകാരിക തലത്തില് സംവദിക്കാനും ബന്ധപ്പെടാനും കഴിയുന്ന ഒരു സൂപ്പര് ഹീറോയെ സൃഷ്ടിക്കാനാണ് ഞങ്ങള് ശ്രമിച്ചത്.ഒരു സൂപ്പര് ഹീറോ സിനിമയുടെ പ്രധാന ഘടകങ്ങള് ആക്ഷനും ചടുലതയുമാണെങ്കിലും ശക്തമായൊരു ആഖ്യാനത്തിലൂന്നിയ കഥയായിരിക്കും മിന്നല് മുരളിയുടേത്. റിലീസിനായി എല്ലാവരെയും പോലെ ഞാനും കാത്തിരിക്കുകയാണ്. ഇത് ഞങ്ങള് മുഴുവന് ടീമിന്റെയും സ്വപ്ന സിനിമയാണ്. നെറ്റ്ഫ്ലിക്സ് പോലെയുള്ള ഒരു ലോകോത്തര പ്ലാറ്റ്ഫോമില് റിലീസ് ചെയ്യുന്നതില് ഒരുപാട് സന്തോഷമുണ്ട്.’-ബേസില് ജോസഫ് പറയുന്നു.
‘നിര്മാതാവ് എന്ന നിലയില് ഈ സിനിയുടെ ഭാഗമാകാന് കഴിഞ്ഞതില് എനിക്കഭിമാനമുണ്ട്. മിന്നല് മുരളിയുടെ വിജയത്തിനായി ഞങ്ങള് മികച്ച അഭിനേതാക്കളെയും സാങ്കേതിക പ്രവര്ത്തകരെയും കൊണ്ടുവന്നു. ഈ സൂപ്പര് ഹീറോ സിനിമ അതിന്റെ കരുത്തില് ഭാഷകളെ മറികടക്കും. ഇത് മനുഷ്യരുടെ വികാര വിചാരങ്ങളുടെ, സാഹചര്യങ്ങളുടെ കഥയാണ്. മിന്നല് മുരളി എനിക്ക് അനുഭൂതിയും അഭിമാനവും ആണ്. നെറ്റ്ഫ്ലിക്സുമായ് ചേര്ന്ന് പ്രവര്ത്തിക്കുവാന് അവസരം ലഭിച്ചതില് ഞാന് വളരെ സന്തോഷിക്കുന്നു. മിന്നല് മുരളി ഒരു തുടക്കം മാത്രമാണ്.’-സോഫിയ പോള് പറഞ്ഞു
‘തുടക്കം മുതലേ മിന്നല് മുരളി എന്ന കഥാപാത്രത്തോട് ഒരടുപ്പവും സ്നേഹവുമുണ്ടായി. സിനിമയുടെ മികച്ച വിജയം ഉറപ്പുവരുത്തുന്നതിനായി ഞാന് നിരന്തരം സംവിധായകനുമായി സംവദിക്കുകയും കഥാപാത്രത്തിന്റെ പൂര്ണതയ്ക്കുവേണ്ടി ഒരുപാട് പ്രയത്നിക്കുകയും ചെയ്തു. ഒരുപാടു കാര്യങ്ങള് പഠിക്കാന് കഴിഞ്ഞു. പ്രതികൂലമായ ഈ ചുറ്റുപാടിലും പ്രേക്ഷകര് നെറ്റ്ഫ്ലിക്സിലൂടെ സ്വന്തം വീടുകളിലിരുന്ന് സിനിമ കാണുകയും ആസ്വദിക്കുകയും ചെയ്യുന്നതില് ഞാന് സന്തോഷിക്കുന്നു. ഞാന് മിന്നല് മുരളിയെ ഇഷ്ടപ്പെടുന്നതുപോലെ ഓരോ പ്രേക്ഷകനും മിന്നല് മുരളിയെ നെഞ്ചേറ്റും എന്നാണ് പ്രതീക്ഷ.’-ടൊവീനോ പറയുന്നു.
‘ഗോദ’യ്ക്കു ശേഷം ടൊവീനോയെ നായകനാക്കി ബേസില് ജോസഫ് സംവിധാനം ചെയ്യുന്ന രണ്ടാമത്തെ ചിത്രമാണ് മിന്നല് മുരളി. മലയാളത്തിലെ ആദ്യ സൂപ്പര്ഹീറോ ചിത്രം എന്ന വിശേഷണത്തോടെ എത്തുന്ന ‘മിന്നല് മുരളി’ വലിയ ബജറ്റിലാണ് ഒരുങ്ങുന്നത്. മലയാളത്തിനു പുറമെ തമിഴ്, തെലുങ്ക്, കന്നഡ, ഹിന്ദി ഭാഷകളിലും ചിത്രം എത്തും.
ജിഗര്ത്തണ്ട, ജോക്കര് തുടങ്ങിയ ചിത്രങ്ങളിലൂടെ ശ്രദ്ധേയനായ തമിഴ് താരം ഗുരു സോമസുന്ദരവും ചിത്രത്തിലെ ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്. അജു വര്ഗീസ്, ബൈജു, ഹരിശ്രീ അശോകന്, ഫെമിന ജോര്ജ് തുടങ്ങിയവരും പ്രധാന കഥാപാത്രങ്ങളെ അവതരിപ്പിക്കുന്നു. അരുണ് അനിരുദ്ധന്, ജസ്റ്റിന് മാത്യു എന്നിവരാണ് ചിത്രത്തിന്റെ രചന നിര്വഹിച്ചിരിക്കുന്നത്.
സമീര് താഹിര് ആണ് ഛായാഗ്രഹണം. സംഗീതം