മമ്മൂട്ടി ചിത്രം ‘കണ്ണൂര് സ്ക്വാഡി’ന് ബോക്സ് ഓഫീസില് വന് നേട്ടം. ആദ്യ ദിനം 2.4 കോടി രൂപ കളക്ഷന് നേടിയ ചിത്രം തുടര്ന്നുള്ള ദിവസങ്ങളിലും ഗംഭീര കളക്ഷനാണ് സ്വന്തമാക്കുന്നത്. കേരളത്തില് കനത്ത മഴ തുടരുമ്പോഴും തിയേറ്ററില് ജനപ്രളയമാണ്. ചിത്രം രണ്ടാം ദിനം 2.75 കോടിയാണ് നേടിയത്.
മൂന്നാം ദിവസം 3.45 കോടിയായി കളക്ഷന് ഉയര്ന്നു. കനത്ത മഴയിലും മമ്മൂട്ടി ചിത്രം പ്രേക്ഷകരെ ആകര്ഷിക്കുന്നു എന്നത് വമ്പന് വിജയത്തിന്റെ സൂചനയാണ്. വന് റിലീസ് അല്ലാതെ എത്തിയ ചിത്രം എന്ന നിലയില് മമ്മൂട്ടിയുടെ കണ്ണൂര് സ്ക്വാഡിന് ലഭിച്ചു കൊണ്ടിരിക്കുന്നത് വമ്പന് കളക്ഷനാണ് എന്നതാണ് പ്രത്യേകത.
മമ്മൂട്ടി നിറഞ്ഞു നില്ക്കുന്ന ഒരു ത്രില്ലര് ചിത്രമാണ് കണ്ണൂര് സ്ക്വാഡ്. റോബി വര്ഗീസ് രാജാണ് ചിത്രം സംവിധാനം ചെയ്തിരിക്കുന്നത്. മുഹമ്മദ് ഷാഫിക്കൊപ്പം കണ്ണൂര് സ്ക്വാഡിന്റെ തിരക്കഥാ രചനയില് നടന് റോണി ഡേവിഡ് രാജും പങ്കാളിയായിരിക്കുന്നു.
ദുല്ഖര് സല്മാന്റെ വേഫെറര് ഫിലിംസ് ആണ് കണ്ണൂര് സ്ക്വാഡിന്റെ വിതരണം. വിജയരാഘവന്, അസീസ് നെടുമങ്ങാട്, ശബരീഷ്, റോണി ഡേവിഡ്, മനോജ് കെ യു, അര്ജുന് രാധാകൃഷ്ണന്, ദീപക് പറമ്പോല്, ധ്രുവന്, ഷെബിന് ബെന്സണ് തുടങ്ങി നിരവധി താരങ്ങളും ചിത്രത്തില് വേഷമിട്ടിട്ടുണ്ട്.