ദുൽഖർ സൽമാനെ നായകനാക്കി സംവിധായകൻ ജോഷിയുടെ മകൻ അഭിലാഷ് ജോഷി ആദ്യമായി സംവിധാനം ചെയ്ത സിനിമയാണ് ‘കിംഗ് ഓഫ് കൊത്ത’. തിയേറ്ററുകളിൽ സിനിമ സാമ്പത്തികമായി വിജയം കണ്ടില്ലെങ്കിലും ഒ. ടി. ടി റിലീസ് വന്നതോട് കൂടികുറച്ച് മോശം അഭിപ്രായമാണ് ചിത്രത്തിന് കിട്ടികൊണ്ടിരിക്കുന്നത്. കൂടാതെ സോഷ്യൽ മീഡിയയിൽ നിരവധി ട്രോളുകളാണ് ചിത്രത്തിന്റെ പേരിൽ ഇപ്പോൾ ഇറങ്ങുന്നത്.
അത്തരത്തിൽ ചർച്ചയായ കിംഗ് ഓഫ് കൊത്തയിലെ ഒരു രംഗമായിരുന്നു കൊത്ത രാജുവും കണ്ണൻ ഭായിയും നേർക്കുനേർ വരുന്ന രംഗം. വില്ലന്മാരോട് കൊത്തയിൽ നിന്നും പുറത്തു പോകാൻ പറയുന്ന രംഗത്തിൽ കൊത്ത രാജുവിന് പിറകിലായി നിൽക്കുന്ന ആളെയാണ് സോഷ്യൽ മീഡിയ ഇന്നലെ മുതൽ തേടുന്നത്. കാരണമെന്താണെന്നുവെച്ചാൽ കൊത്ത രാജുവിനെക്കാളും കലിപ്പിലാണ് ഇയാൾ സ്ക്രീനിൽ വരുന്നത്.
ചിത്രത്തിന്റെ ഒ. ടി. ടി റിലീസിന് ശേഷം ഈ രംഗത്തിലെ അഭിനയത്തിന് ഈ നടന് നിരവധി പ്രശംസകളാണ് കിട്ടിക്കൊണ്ടിരിക്കുന്നത്. നായകനേക്കാൾ കലിപ്പിൽ പിറകിൽ നിൽക്കുന്ന ആൾക്കാർ ഇതിന് മുന്നെയും വൈറൽ ആയിട്ടുണ്ട്. കൊത്ത ഇറങ്ങിയതോട് കൂടി ഈ നടൻ ആരാണെന്നാണ് സോഷ്യൽ മീഡിയ അന്വേഷിക്കുന്നത്.
സിനിമകളിൽ ജൂനിയർ ആർട്ടിസ്റ്റായി വർക്ക് ചെയ്യുന്ന തിരുവനന്തപുരം സ്വദേശി ഷെബിനാണ് ആ കലിപ്പൻ. ചിത്രം തിയേറ്ററിൽ നിന്ന് കണ്ടിരുന്നെന്നും ഒ. ടി. ടിയിൽ വന്നപ്പോൾ ചെറിയ രംഗമാണെങ്കിൽ പോലും ശ്രദ്ധിക്കപ്പെട്ടത്തിൽ സന്തോഷമുണ്ടെന്നും ഏഷ്യനെറ്റിനോട് ഷെബിൻ പറഞ്ഞു. ചിത്രത്തിലെ പ്രസ്തുത രംഗവും ഷെബിൻ തന്റെ ഇൻസ്റ്റഗ്രാമിൽ പോസ്റ്റ് ചെയ്തിട്ടുണ്ട്.
മുൻപ് കിരീടം സിനിമയിൽ മോഹൻലാലിനെക്കാളും കലിപ്പിൽ കീരിക്കാടൻ ജോസിനെ നോക്കുന്ന ഒരു ആർട്ടിസ്റ്റിനെ സോഷ്യൽ മീഡിയ ഇതേ പോലെ വൈറൽ ആക്കിയിരുന്നു. ഇപ്പോഴിതാ കിംഗ് ഓഫ് കൊത്തയിലൂടെ ഷെബിനും ചർച്ചയായിരിക്കുകയാണ്.