തമിഴ്‌നാട് മുന്‍ മുഖ്യമന്ത്രി ജയലളിതയുടെ ബയോപിക് ആയി ഒരുങ്ങുന്ന “തലൈവി” ചിത്രത്തിന്റെ ട്രെയ്‌ലര്‍ പുറത്ത്. കങ്കണ റണൗട്ട് ജയലളിതയായി വേഷമിടുന്ന ചിത്രത്തില്‍ അരവിന്ദ് സാമിയാണ് എംജിആര്‍ ആയി വേഷമിടുന്നത്. എ.എല്‍ വിജയ് സംവിധാനം ചെയ്യുന്ന ചിത്രം ഏപ്രില്‍ 23ന് ആണ് റിലീസ് ചെയ്യുന്നത്. ജയലളിതയുടെ സിനിമാ പ്രവേശവും രാഷ്ട്രീയക്കാരിയായുള്ള മാറ്റവുമാണ് ട്രെയ്‌ലറിന്റെ ഹൈലൈറ്റ്.
കങ്കണയുടെ 34ാം ജന്മദിനത്തിലാണ് ട്രെയ്‌ലര്‍ പുറത്തു വിട്ടിരിക്കുന്നത്. ഭാഗ്യശ്രീ, നാസര്‍, സമുദ്രക്കനി, മധുബാല എന്നിവരാണ് ചിത്രത്തില്‍ മറ്റു പ്രധാന കഥാപാത്രങ്ങളെ അവതരിപ്പിക്കുന്നത്. വിഷ്ണുവര്‍ധന്‍ ഇന്ദുരി, ശൈലേഷ് ആര്‍ സിംഗ് എന്നിവരാണ് ചിത്രം നിര്‍മ്മിക്കുന്നത്. വിശാല്‍ വിത്തല്‍ ഛായാഗ്രഹണവും ജിവി പ്രകാശ് സംഗീതവും ഒരുക്കുന്നു.
തലൈവിയുടെതായി നേരത്തെ പുറത്തെത്തിയ ടീസറും ചിത്രങ്ങളും സോഷ്യല്‍ മീഡിയയില്‍ വൈറലായിരുന്നു. കങ്കണയുടെ അമ്പരപ്പിക്കുന്ന മേക്കോവര്‍ കൊണ്ടാണ് ഫസ്റ്റ് ലുക്ക് ശ്രദ്ധിക്കപ്പെട്ടത്. ഇതിനായി പ്രോസ്തെറ്റിക് മേക്കപ്പ് ചെയ്യുന്ന കങ്കണയുടെ വീഡിയോയും ചിത്രങ്ങളും വൈറലായിരുന്നു. എന്നാല്‍ കങ്കണയുടെ തലൈവി ലുക്ക് ജയലളിതയുമായി സാമ്യം ഇല്ലാത്തതാണ എന്ന വിമര്‍ശനങ്ങള്‍ ഉയര്‍ന്നിരുന്നു.
കങ്കണയ്ക്ക് ജയലളിതയുമായി ഒരു സാമ്യവുമില്ലെന്നും ഫസ്റ്റ് ലുക്കില്‍ ബൊമ്മ പോലെ ഇരിക്കുന്നുവെന്നും മേക്കപ്പ് ദുരന്തം എന്നുമുള്ള വിമര്‍ശനങ്ങളും എത്തിയിരുന്നു. ഒരു സൂപ്പര്‍സ്റ്റാര്‍ ഹീറോയിന്‍, റെവല്യൂഷനറി ഹീറോ…നിങ്ങള്‍ക്കറിയുന്ന പേര് എന്നാല്‍ നിങ്ങള്‍ക്കറിയാത്ത ജീവിത കഥ എന്നാണ് ഫാസ്റ്റ് ലുക്കില്‍ നല്‍കിയിരിക്കുന്ന ടാഗ്‌ലൈന്‍.