ഓട്ടം സിനിമയ്ക്ക് വേണ്ടി ചവിട്ടുനാടകം പഠിച്ച കലാഭവന്‍ ഷോജോണ്‍ പറയുന്നു ചവിട്ടു നാടകം ഒരു മഹാ സംഭവം തന്നെയെന്ന്. ഗോതുരുത്ത് യുവജന കലാസമിതിയിലെ ചവിട്ടു നാടക പ്രവര്‍ത്തകനായ തമ്പി ആശാനാണ് ഷാജോണിനെ ചവിട്ടു നാടകം പരിശീലിപ്പിച്ചത്.ഓട്ടം സിനിമയില്‍ ചവിട്ടു നാടകത്തിന് പ്രധാന സ്ഥാനമാണുള്ളത്. കലാഭവന്‍ ഷാജോണും, രോഹിണിയും ചവിട്ടു നാടകം പഠിച്ചാണ് ഈ രംഗങ്ങളില്‍ അഭിനയിച്ചിരിക്കുന്നത്.
ജീവിതത്തിലെ വിജയ പരാജയങ്ങള്‍ക്കിടയിലെ യാഥാര്‍ത്ഥ്യങ്ങള്‍ പ്രമേയമാക്കിയ ഓട്ടം മാര്‍ച്ച് എട്ടിന് തിയേറ്ററുകളില്‍ എത്തുകയാണ്. ലാല്‍ ജോസിന്റെ റിയാലിറ്റി ഷോയായിരുന്ന നായികാ നായകനിലെ നന്ദു ആനന്ദ് റോഷന്‍ ഉല്ലാസ് എന്നിവരാണ് ചിത്രത്തിലെ കേന്ദ്ര കഥാപാത്രങ്ങളെ അവതരിപ്പിക്കുന്നത്.
അലന്‍സിയര്‍, മണികണ്ഠന്‍ ആചാരി, സുധീര്‍ കരമന, രാജേഷ് ശര്‍മ്മ, അല്‍ത്താഫ്, ചന്ദ്രദാസ്, രോഹിണി, തെസ്‌നിഖാന്‍ രേണു, മാധുരി, ജോളി ചിറയത്ത് തുടങ്ങിയവരാണ് മറ്റ് പ്രധാന കഥാപാത്രങ്ങളായി എത്തുന്നത്. നിറം പിടിപ്പിക്കാത്ത ജീവിത യാഥാര്‍ത്ഥ്യങ്ങളാണ് ചിത്രത്തിന്റെ ഓട്ടത്തിന്റെ സവിശേഷത. ചിത്രത്തിന്റെ ട്രെയിലര്‍ ഇതിനോടകം സോഷ്യല്‍ മീഡിയയില്‍ ശ്രദ്ധ നേടിയിട്ടുണ്ട്.