ആദ്യം ഷോര്‍ട്ട് ഫിലിം ആയി ചെയ്യാന്‍ ഉദ്ദേശിച്ച സബ്ജക്ട് പിന്നീട് സിനിമയായി, എന്നാല്‍ തിയേറ്ററില്‍ വന്‍ പരാജയമായി. പക്ഷെ ടിവിയില്‍ എത്തിയപ്പോള്‍ പ്രേക്ഷകര്‍ സിനിമ ഏറ്റെടുത്തു. രണ്ടാം ഭാഗം ബോക്‌സ് ഓഫീസില്‍ നിറചിരിയുടെ മാലപടക്കം കൊളുത്തി. ഇനി മൂന്നാം ഭാഗത്തിന്റെ വരവാണ്.
‘ആട് 3’ എന്ന് വരും എന്ന ചോദ്യത്തിനുള്ള മറുപടി കഴിഞ്ഞ ദിവസം പ്രേക്ഷകര്‍ക്ക് ലഭിച്ചു കഴിഞ്ഞു. മലയാളി പ്രേക്ഷകരുടെ ഏറ്റവും പ്രിയപ്പെട്ട കള്‍ട്ട് കോമഡി ചിത്രമാണ് ‘ആട്’. ജയസൂര്യയും വിജയ് ബാബുവും സംവിധായകന്‍ മിഥുന്‍ മാനുവല്‍ തോമസും ചേര്‍ന്നാണ് മൂന്നാം ഭാഗം ഔദ്യോഗികമായി പ്രഖ്യാപിച്ചത്.
”പാപ്പനും പിള്ളേരും വരുവാ കേട്ടോ…ഇനി അങ്ങോട്ട് ”ആടുകാലം” എന്നാണ് ചിത്രം പ്രഖ്യാപിച്ചു കൊണ്ട് കുറിച്ചത്. മൂന്നാം വരവില്‍ പാപ്പനൊപ്പം ഡ്യൂഡും അറയ്ക്കല്‍ അബുവും സാത്താന്‍ സേവ്യറും ഷര്‍ബത്ത് ഷമീറും ക്യാപ്റ്റന്‍ ക്ലീറ്റസും ശശി ആശാനുമൊക്കെ ഉണ്ടാകും.
കഴിഞ്ഞ രണ്ട് ഭാഗങ്ങളില്‍ നിന്നും മാറി വമ്പന്‍ മുതല്‍ മുടക്കിലാണ് മൂന്നാം ഭാഗം എത്തുന്നത്. ഏകദേശം 40 കോടി മുതല്‍ മുടക്കിലൊരുങ്ങുന്ന ഫ്രൈഡേ ഫിലിംസിന്റെ ഏറ്റവും വലിയ നിര്‍മാണ സംരംഭമാകും ആട് 3. 2015ലാണ് ആട്: ഒരു ഭീകരജീവിയാണ് തിയേറ്ററുകളിലെത്തുന്നത്.
തുടര്‍ന്ന് ഈ ജനപ്രീതിയുടെ പിന്തുണയിലാണ് സിനിമയുടെ രണ്ടാം ഭാഗം നിര്‍മാതാവായ വിജയ് ബാബുവും മിഥുനും ഒരുക്കാന്‍ തീരുമാനിച്ചതും. അങ്ങനെ 2017ല്‍ ആട് 2 എത്തി. മലയാളസിനിമയില്‍ തന്നെ ആദ്യമായാകും പരാജയപ്പെട്ടൊരു ചിത്രത്തിന് രണ്ടാം ഭാഗം വന്ന് അത് സൂപ്പര്‍ഹിറ്റായി മാറിയത്.