സൂര്യയെ നായകനാക്കി ശിവ ഒരുക്കുന്ന ബ്രഹ്‌മാണ്ഡ ചിത്രത്തിന്റെ ഷൂട്ടിംഗ് പുരോഗമിക്കുകയാണ്. സൂര്യയുടെ കരിയറിലെ ഏറ്റവും വലിയ ചിത്രമായി ഒരുക്കുന്ന ഈ മാസ്സ് ആക്ഷന്‍ ഫാന്റസി ഡ്രാമ ത്രീഡിയില്‍ കൂടിയാണ് ഒരുക്കുന്നത്.
ഇപ്പോഴിതാ ഈ സിനിമയെക്കുുറിച്ചുള്ള കൂടുതല്‍ വിവരങ്ങള്‍ പുറത്ത് വിട്ടിരിക്കുകയാണ് മലയാളിയും സിനിമയുടെ എഡിറ്ററുമായ നിഷാദ് യൂസഫ്. ആയിരം വര്‍ഷം മുമ്പേ നടക്കുന്ന കഥയാണ് ഈ ചിത്രം പറയുന്നതെന്നും, അതിനൊപ്പം വര്‍ത്തമാന കാലവും ഷൂട്ട് ചെയ്യുന്നുണ്ടെന്നും നിഷാദ് പറയുന്നു.
സൂര്യയുടെ ഇന്ററോഡക്ഷന്‍ അടക്കമുള്ള ഭാഗങ്ങള്‍ ആദ്യ ഷെഡ്യൂളില്‍ ഷൂട്ട് ചെയ്‌തെന്നും, ഇനിയുള്ള ഭാഗങ്ങള്‍ വമ്പന്‍ ആക്ഷന്‍ ഉള്‍പ്പെട്ട സീനുകള്‍ ആണെന്നും നിഷാദ് വെളിപ്പെടുത്തി. അടുത്ത ഷെഡ്യൂള്‍ ശ്രീലങ്കയില്‍ ആയിരിക്കുമെന്നാണ് കേട്ടതെന്നും, കൂടുതല്‍ ഷൂട്ടും ഇനി അവിടുള്ള വനാന്തരങ്ങളില്‍ ആയിരിക്കുമെന്നും നിഷാദ് യൂസഫ് പറഞ്ഞു.
തല്ലുമാല, ഓപ്പറേഷന്‍ ജാവക്ക് ശേഷം തരുന്‍ മൂര്‍ത്തി ഒരുക്കിയ സൗദി വെള്ളക്ക, അജഗജാന്തരത്തിനു ശേഷം ടിനു പാപ്പച്ചന്‍ ഒരുക്കിയ ചാവേര്‍ എന്നീ ചിത്രങ്ങള്‍ പൂര്‍ത്തിയാക്കിയതിന് ശേഷമാണ് നിഷാദ് യൂസഫ് ഈ സൂര്യ- ശിവ ചിത്രത്തില്‍ ജോയിന്‍ ചെയ്തത്. സൂര്യയുടെ 42 ആം ചിത്രമായി ഒരുക്കുന്ന ഈ ചിത്രത്തിലെ നായികാ വേഷം ചെയ്യുന്നത് പ്രശസ്ത ബോളിവുഡ് താരസുന്ദരിയായ ദിശ പട്ടാണി ആണ്.
യു വി ക്രിയേഷന്‍സിന്റെ ബാനറില്‍ വംശി പ്രമോദും സ്റ്റുഡിയോ ഗ്രീനിന്റെ ബാനറില്‍ കെ ഇ ജ്ഞാനവേല്‍രാജയും ചേര്‍ന്നാണ് ഈ ചിത്രം നിര്‍മ്മിക്കുന്നത്.