ഏറെ ഹൈപ്പോടെ എത്തിയ ദുല്ഖര് സല്മാന് ചിത്രം ‘കിംഗ് ഓഫ് കൊത്ത’യ്ക്ക് സമ്മിശ്ര പ്രതികരണങ്ങളാണ് പ്രേക്ഷകരില് നിന്നും ലഭിച്ചു കൊണ്ടിരിക്കുന്നത്. കൂടുതല് നെഗറ്റീവ് അഭിപ്രായങ്ങള് എത്തിയതോടെ സിനിമയ്ക്കെതിരെ സംഘടിതമായി ഡീഗ്രേഡിംഗ് നടത്തുകയാണെന്ന് ആരോപിച്ച് ചിത്രത്തിന്റെ അണിയറ പ്രവര്ത്തകര് രംഗത്തെത്തിയിരുന്നു.
ചിത്രത്തിന്റെ ആദ്യ ദിന കളക്ഷന് കണക്കുകളാണ് ഇപ്പോള് പുറത്തുവരുന്നത്. കേരളത്തില് മാത്രം ആദ്യ ദിനം ചിത്രം ആറ് കോടിയിലധികം നേടിയതായാണ് റിപ്പോര്ട്ടുകള്. റിലീസ് ദിനത്തില് കേരളത്തില് അങ്ങോളമിങ്ങോളം ഹൌസ് ഫുള് ഷോകളാണ് ചിത്രത്തിന് ലഭിച്ചത്.
കൊച്ചി മള്ട്ടിപ്ലെക്സുകളില് ചിത്രം റെക്കോര്ഡും നേടിയിട്ടുണ്ട്. ‘കബാലി’യെ മറികടന്ന് കൊച്ചി മള്ട്ടിപ്ലെക്സുകളില് നിന്ന് റിലീസ് ദിനത്തില് ഏറ്റവുമധികം കളക്ഷന് നേടുന്ന ചിത്രമായി മാറിയിരിക്കുകയാണ് കിംഗ് ഓഫ് കൊത്ത. കബാലിയുടെ 30.21 ലക്ഷത്തെ മറികടന്ന് 32 ലക്ഷമാണ് ചിത്രം നേടിയത്.
രണ്ടാം ദിനമായ വെള്ളിയാഴ്ചയും ചിത്രത്തിന് മികച്ച ബുക്കിംഗ് ആണ് ലഭിക്കുന്നത്. വേറിട്ട രണ്ട് ഗെറ്റപ്പുകളിലാണ് ചിത്രത്തില് ദുല്ഖര് പ്രത്യക്ഷപ്പെടുന്നത്. ബിഗ് ബജറ്റില്, വലിയ കാന്വാസില് പൂര്ത്തീകരിക്കപ്പെട്ടിരിക്കുന്ന ചിത്രം സീ സ്റ്റുഡിയോസും ദുല്ഖറിന്റെ വേഫെറര് ഫിലിംസും ചേര്ന്നാണ് നിര്മ്മിച്ചിരിക്കുന്നത്.
ദുല്ഖറിനോടൊപ്പം ഐശ്വര്യ ലക്ഷ്മി, ഷബീര് കല്ലറയ്ക്കല്, പ്രസന്ന, ഗോകുല് സുരേഷ് , ഷമ്മി തിലകന്, ശാന്തി കൃഷ്ണ, അനിഖാ സുരേന്ദ്രന് തുടങ്ങി വമ്പന് താരനിരയാണ് ചിത്രത്തിലുള്ളത്. ഛായാഗ്രഹണം നിമീഷ് രവി, ജേക്സ് ബിജോയ്, ഷാന് റഹ്മാന് എന്നിവരാണ് ചിത്രത്തിന് സംഗീതമൊരുക്കിയത്.