ആദ്യ ദിനം തന്നെ തിയേറ്ററുകളില് നിന്നും തണുപ്പന് പ്രതികരണം ലഭിച്ച ചിത്രമാണ് ദിലീപിന്റെ ‘തങ്കമണി’. ഒരുപാട് നെഗറ്റീവ് റിവ്യൂകള് എത്തിയെങ്കിലും ചില പ്രേക്ഷകരില് നിന്നും ചിത്രം നല്ല പ്രതികരണങ്ങളും നേടുന്നുണ്ട്. ചിത്രത്തിന്റെ കളക്ഷന് റിപ്പോര്ട്ട് ആണ് ഇപ്പോള് ശ്രദ്ധ നേടുന്നത്.
മാര്ച്ച് 7ന് റിലീസ് ചെയ്ത ചിത്രം 53 ലക്ഷമാണ് ബോക്സ് ഓഫീസില് നിന്നും നേടിയത്. രണ്ടാം ദിനം 41 ലക്ഷം നേടിയ ചിത്രം മൂന്നാം ദിനം 39 ലക്ഷമാണ് നേടിയത്. ഇതുവരെ 1.33 കോടി രൂപയാണ് ചിത്രം തിയേറ്ററില് നിന്നും നേടിയത് എന്നാണ് സാക്നില്ക്.കോം എന്ന ട്രേഡ് അനലിസ്റ്റ് സൈറ്റ് റിപ്പോര്ട്ട് ചെയ്യുന്നത്.
കേരള ചരിത്രത്തില് ഏറെ ചര്ച്ചയായി മാറിയ സംഭവമാണ് തങ്കമണി. ഒരു ബസ് തടയലും അതിന് ശേഷമുണ്ടായ പോലീസിന്റെ അതിക്രൂരമായ അക്രമങ്ങളുമാണ് സംസ്ഥാന ചരിത്രത്തിലെ തന്നെ തീരാനോവായി മാറിയ തങ്കമണി.
38 വര്ഷങ്ങള്ക്ക് മുമ്പ് നടന്ന സംഭവം പശ്ചാത്തലമാക്കി ഒരുക്കിയ ചിത്രം സംവിധാനം ചെയ്തത് രതീഷ് രഘുനന്ദനനാണ്. സൂപ്പര് ഗുഡ് ഫിലിംസിന്റെ ബാനറില് ആര് ബി ചൗധരി, ഇഫാര് മീഡിയയുടെ ബാനറില് റാഫി മതിര എന്നിവര് ചേര്ന്ന് നിര്മ്മിക്കുന്നതാണ് ചിത്രം.
നീത പിളള, പ്രണിത സുഭാഷ്, അജ്മല് അമീര്, സുദേവ് നായര്, സിദ്ദിഖ്, മനോജ് കെ ജയന്, കോട്ടയം രമേഷ്, മേജര് രവി, സന്തോഷ് കീഴാറ്റൂര്, അസീസ് നെടുമങ്ങാട്, തൊമ്മന് മാങ്കുവ, ജിബിന് ജി, അരുണ് ശങ്കരന്, മാളവിക മേനോന്, രമ്യ പണിക്കര്, മുക്ത, ശിവകാമി, അംബിക മോഹന്, സ്മിനു, ജോണ് വിജയ്, സമ്പത്ത് റാം എന്നിങ്ങനെ നിരവധി താരങ്ങള് ചിത്രത്തില് അണിനിരന്നിരുന്നു.