രാഘവ ലോറൻസ് പ്രധാന കഥാപാത്രമായെത്തുന്ന ‘ചന്ദ്രമുഖി 2’ വിന്റെ കേരളത്തിലെ വിതരണാവകാശം സ്വന്തമാക്കി ഗോകുലം മൂവീസ്. പൊന്നിയിൻ സെൽവനു ശേഷം ലൈക്ക പ്രൊഡക്ഷൻസം ഗോകുലം മൂവീസും ഒന്നിക്കുന്ന ചിത്രം കൂടിയാണ് ചന്ദ്രമുഖി 2.
18 വർഷങ്ങൾക്ക് മുൻപ് രജനികാന്തിനെയും നയൻതാരയെയും പ്രധാന കഥാപാത്രങ്ങളാക്കി ബോക്സ് ഓഫീസിൽ ചരിത്രം സൃഷ്ടിച്ച സിനിമയായിരുന്നു ചന്ദ്രമുഖി. ഇപ്പോഴിതാ സിനിമയ്ക്ക് രണ്ടാം ഭാഗം വരുമ്പോൾ പ്രേക്ഷകരും ആരാധകരും വലിയ പ്രതീക്ഷയിലാണ്.
രാഘവ ലോറൻസിനൊപ്പം കങ്കണ റണാവത്താണ് സിനിമയിൽ പ്രധാന വേഷത്തിലെത്തുന്നത്. വടിവേലു, രാധിക ശരത്കുമാർ, ലക്ഷ്മി മേനോൻ, മഹിമ നമ്പ്യാർ സൃഷ്ടി എന്നിവരാണ് ലൈക്ക പ്രൊഡക്ഷൻസ് നിർമ്മിക്കുന്ന സിനിമയിലെ മറ്റ് പ്രധാന താരങ്ങൾ.
ലൈക്ക പ്രൊഡക്ഷൻസുമായി ഗോകുലം മൂവീസ് സഹകരിക്കുന്ന ആറാമത് ചിത്രമായിരിക്കും ചന്ദ്രമുഖി 2. ലൈക്ക പ്രൊഡക്ഷൻസുമായി സഹകരിക്കുന്നതിൽ തങ്ങൾ അങ്ങേയറ്റം അഭിമാനിക്കുന്നുവെന്നും തമിഴ്നാട്ടിലും കേരളത്തിലും ശ്രീ ഗോകുലം മൂവീസ് വിതരണം വ്യാപിപ്പിക്കുകയും ചെയ്തതോട് കൂടി ഇനിയും ലൈക്ക പ്രൊഡക്ഷൻസുമായി ചിത്രങ്ങൾ പ്രതീക്ഷിക്കാം എന്ന് ഗോകുലം മൂവീസിന്റെ എക്സിക്യൂടീവ് പ്രൊഡ്യൂസർ കൃഷ്ണമൂർത്തി പ്രതികരിച്ചു.
സെപ്റ്റംബർ 28 നാണ് ചിത്രം തീയേറ്ററുകളിലെത്തുന്നത്. ഡ്രീം ബിഗ് ഫിലിംസ് ആണ് ഗോകുലം മൂവീസിന്റെ വിതരണ പങ്കാളികൾ.