ധ്യാന് ശ്രീനിവാസനും അജു വര്ഗീസും ഒന്നിക്കുന്ന പുതിയ ചിത്രത്തില് നായികയായി തന്വി റാം. “ഖാലി പേഴ്സ് ഓഫ് ദി ബില്യനേഴ്സ്” എന്ന ചിത്രത്തില് കാരട്ടെ ബ്ലാക്ക് ബെല്റ്റ് നേടിയ കഥാപാത്രമായാണ് തന്വി വേഷമിടുക. ധ്യാന് അവതരിപ്പിക്കുന്ന കഥാപാത്രത്തിന്റെ കാമുകിയാണ് ഈ കഥാപാത്രം എന്നും തന്വി ടൈംസ് ഓഫ് ഇന്ത്യയോട് പറഞ്ഞു.
ലിജോ ജോസ് പെല്ലിശ്ശേരി, വി.എം വിനു എന്നിവരുടെ സംവിധാന സഹായിയും പരസ്യമേഖലയിലും പ്രവര്ത്തിച്ച മാക്സ് വെല് ജോസ് ആണ് ഖാലി പേഴ്സ് ഓഫ് ദി ബില്യനേഴ്സ് തിരക്കഥ ഒരുക്കി സംവിധാനം ചെയ്യുന്നത്. ചിത്രത്തിനായി കരാട്ടെ അഭ്യസിക്കുകയാണ് താനെന്നും തന്വി വ്യക്തമാക്കി. കൊച്ചിയിലാണ് ചിത്രത്തിന്റെ ഷൂട്ടിംഗ് പുരോഗമിക്കുന്നത്.
അമ്പിളി എന്ന ആദ്യ ചിത്രത്തിലൂടെ ശ്രദ്ധേയായ തന്വി കപ്പേള എന്ന സിനിമയിലും വേഷമിട്ടിട്ടുണ്ട്. ബിബിന്ദാസ്, ബിബിന് വിജയ് എന്ന കഥാപാത്രങ്ങളായാണ് ധ്യാനും അജുവും ചിത്രത്തില് വേഷമിടുന്നത്. സ്കൂളില് വെച്ച് ഇവരെ കൂട്ടുകാര് ദാസനും വിജയനുമെന്ന പേരു വിളിക്കുന്നതോടെ ഇവര് വലിയ ചങ്ങാതിമാരായി.
ഐ.ടി.പ്രൊഫഷണലുകളായി മാറിയ ഇവര് സ്വന്തമായി ഒരു ബിസിനസ് ആരംഭിക്കുകയും ചെയ്യുന്നു. ഇതിനിടയില് നോട്ടു നിരോധനം, ഓഖി ദുരന്തം, പ്രളയം, കൊറോണ തുടങ്ങിയ സാഹചര്യങ്ങളിലൂടെ കടന്നുപോകുന്ന ഇവരുടെ ജീവിതമാണ് സിനിമയുടെ പ്രമേയം.