ഒടുവിൽ മിന്നൽ മുരളിക്ക് ശേഷം ഇനി ആര് എന്ന ചോദ്യത്തിന് ഉത്തരമായിരിക്കുകയാണ്. മലയാളത്തിൽ പുതിയ സൂപ്പർ ഹീറോ യൂണിവേഴ്സുമായി എത്താൻ ഒരുങ്ങുകയാണ് ദുൽഖർ സൽമാൻ. ‘ലോക – ചാപ്റ്റർ വൺ: ചന്ദ്ര’ എന്നാണ് വേഫറെർ സിനിമാറ്റിക് യൂണിവേഴ്സ് എന്ന് പേരിട്ടിരിക്കുന്ന പരമ്പരയിലെ ആദ്യ ചിത്രത്തിന്റെ പേര്. ‘ലോക’ എന്ന് പേരുള്ള ഒരു സൂപ്പർ ഹീറോ സിനിമാറ്റിക് യൂണിവേഴ്സിലെ ആദ്യ ചിത്രമായാണ് സിനിമ എത്തുന്നത്. സിനിമയുടെ ഫസ്റ്റ് ലുക്ക് പോസ്റ്റർ കഴിഞ്ഞ ദിവസം പുറത്തിറങ്ങിയിരുന്നു.
‘ലോകയെ അനാവരണം ചെയ്യുന്നു – ഇവിടെ പുരാണങ്ങൾക്ക് ജീവൻ വയ്ക്കും. ചാപ്റ്റർ ഒന്ന്: ചന്ദ്ര’ എന്ന കുറിപ്പോടെയാണ് ദുൽഖർ തന്റെ സോഷ്യൽ മീഡിയ പേജിൽ പോസ്റ്റർ പങ്കുവച്ചത്. ഒരു സൂപ്പർ ഹീറോ കഥാപാത്രം ആയി കല്യാണി, നസ്ലെൻ എന്നിവരാണ് പോസ്റ്ററിൽ ഉള്ളത്. മലയാള സിനിമയുടെ ആദ്യ ഫീമെയിൽ സൂപ്പർഹീറോ ആകാൻ ഒരുങ്ങുകയാണ് കല്യാണി എന്ന് പോസ്റ്ററിലെ കല്യാണിയുടെ ലുക്കിലൂടെ മനസിലാക്കാം. ഡൊമിനിക് അരുൺ സംവിധാനം ചെയ്യുന്ന സിനിമയുടെ വളരെ വ്യത്യസ്തമായ പോസ്റ്റർ സോഷ്യൽ മീഡിയയിൽ വൈറലാകുന്നതോടൊപ്പം സിനിമയെക്കുറിച്ച് രസകരമായ പല തിയറികളുമായി സോഷ്യൽ മീഡിയ പ്രേക്ഷകരും എത്തുകയാണ്.
ഹോളിവുഡ് ഉൾപ്പെടെയുള്ള മറ്റ് ഭാഷാ ചിത്രങ്ങളിൽ മാത്രം കണ്ടുവരുന്ന തരത്തിലുള ഒരു കിടിലൻ പോസ്റ്ററാണ് സിനിമയുടേതായി ഇറക്കിയിട്ടുള്ളത്. അതുകൊണ്ട് തന്നെ പ്രേക്ഷകരും ഏറെ ആവേശത്തിലാണ്. മലയാളി പ്രേക്ഷകർക്ക് മുന്നിലേക്ക് ഏറെ വ്യത്യസ്തതയാർന്ന ഒരു കഥാപശ്ചാത്തലമാണ് വേഫെറർ ഫിലിംസ് എത്തിക്കാൻ പോകുന്നത്. സിനിമയെക്കുറിച്ച് മറ്റ് വിവരങ്ങൾ ഒന്നും ടീം പുറത്തു വിട്ടിട്ടില്ലെങ്കിലും ഫാന്റസിയും, സയൻസ് ഫിക്ഷന്റെ സാധ്യതകളും അളക്കുന്ന ഒരു സിനിമയായിരിക്കും എന്നാണ് പലരും പറയുന്നത്.
അതേസമയം, വേഫെറർ ഫിലിംസിന്റെ ഏഴാമത് ചിത്രമാണ് ആരാധകർ ആകാംക്ഷയോടെ കാത്തിരിക്കുന്ന ‘ലോക – ചാപ്റ്റർ വൺ: ചന്ദ്ര.’ വൻ ബജറ്റിലാണ് ചിത്രം ഒരുങ്ങുന്നതെന്നാണ് റിപ്പോർട്ട്. കല്യാണി, നസ്ലെൻ എന്നിവർക്ക് പുറമെ ചന്ദു സലിം കുമാർ, അരുൺ കുര്യൻ, ശാന്തി ബാലചന്ദ്രൻ എന്നിവരും ചിത്രത്തിൽ മറ്റ് കഥാപാത്രങ്ങളെ അവതരിപ്പിക്കും. തരംഗം എന്ന സിനിമയിലൂടെ ശ്രദ്ധ നേടിയ നടി ശാന്തി ബാലചന്ദ്രനാണ് പ്രോജക്ടിന് തിരക്കഥ എഴുതിയിരിക്കുന്നത്. നിർമ്മാതാവായ ദുൽഖർ സൽമാനും, പ്രമുഖ നടൻ ടൊവിനോ തോമസും ഈ സിനിമയിൽ ചെറിയ ക്യാമിയോ വേഷങ്ങളിൽ എത്തും എന്നും റിപ്പോർട്ടുകളുണ്ട്.