താരങ്ങളുടെ മക്കളുടെ സിനിമാ അരങ്ങേറ്റം ആരാധകര്‍ ആഘോഷമാക്കാറുണ്ട്. മക്കളും സിനിമയില്‍ എത്തുമോ എന്ന ചോദ്യങ്ങള്‍ക്ക് മിക്ക താരങ്ങളും കൃത്യമായ മറുപടിയും കൊടുക്കാറുണ്ട്. ഇപ്പോഴിതാ, മക്കളും സിനിമയിലെത്തുമോ എന്ന ചോദ്യത്തിന് രസകരമായ മറുപടി നല്‍കിയിരിക്കുകയാണ് നടന്‍ സലിം കുമാറും.
വനിതയ്ക്ക് നല്‍കിയ അഭിമുഖത്തിലാണ് മക്കള്‍ക്ക് സിനിമാ സ്വപ്‌നങ്ങളുണ്ടോ എന്ന ചോദ്യത്തോട് സലിം കുമാര്‍ പ്രതികരിച്ചിരിക്കുന്നത്. “”ആരെങ്കിലും വീട്ടില്‍ വന്ന് “ഭര്‍ത്താവ് എന്ത്യേ?”എന്നു ചോദിച്ചാല്‍ വര്‍ഷങ്ങളായി എന്റെ ഭാര്യ പറയുന്ന ഉത്തരം “ഷൂട്ടിംഗിന് പോയി” എന്നാണ്. “മക്കളെവിടെ?” എന്നു ചോദിക്കുമ്പോഴും അതേ ഉത്തരം പറഞ്ഞാലെങ്ങനെ ശരിയാകും.””
“”ആ സ്ത്രീക്കുമുണ്ടാകില്ലേ വ്യത്യസ്തത ഇഷ്ടപ്പെടുന്ന മനസ്. അതുകൊണ്ട് അമ്മയെ കൊണ്ട് “ഓഫിസില്‍ പോയി” എന്നു പറയിപ്പിക്കാന്‍ ശ്രമിക്കണം എന്നു മക്കളോടു പറഞ്ഞു കൊടുത്തിട്ടുണ്ട്. മൂത്തവന്‍ ചന്തു എംഎ ചെയ്യുന്നു. ഇളയവന്‍ ആരോമല്‍ ബികോം.””
മക്കള്‍ക്ക് ചെയ്തു കൊടുക്കാന്‍ പറ്റുന്ന കാര്യങ്ങള്‍ പോലെ തന്നെ ചിലതൊക്കെ ചെയ്തു കൊടുക്കാതിരിക്കാനും അച്ഛനെന്ന നിലയില്‍ ശ്രദ്ധിച്ചിട്ടുണ്ടെന്നും സലിം കുമാര്‍ പറയുന്നുണ്ട. മൂത്തമകന്‍ “ലവ് ഇന്‍ സിംഗപ്പൂര്‍” എന്ന സിനിമയില്‍ സലിം കുമാറിന്റെ കുട്ടിക്കാലം അഭിനയിച്ചിരുന്നു. മറ്റ് സിനിമകളൊന്നും ഇല്ലെന്ന് സലിം കുമാര്‍ വ്യക്തമാക്കി.