പ്രൊഡക്ഷൻ കണ്ട്രോളറും നിര്മ്മാതാവുമായ ബാദുഷയ്ക്ക് പിറന്നാൾ ആശംസകളുമായി സംവിധായകനും നടനുമായ സാജിദ് യാഹിയ. മലയാള സിനിമയിലെ രാവണനാണ് ബാദുഷയെന്ന സാജിദ് യാഹിയ പറഞ്ഞു.
സാജിദ് യാഹിയയുടെ വാക്കുകൾ:
രാവണൻ എന്നു കേട്ടിട്ടില്ലേ. രാമായണത്തിലെ പത്തു തലയുള്ള രാവണനല്ല. ഇതു സിനിമയുടെ കാര്യമാണ്.ഇവിടെ നമ്മുടെ മലയാള സിനിമയിൽ നമുക്കും ഉണ്ടൊരു രാവണൻ. പത്തു തലയുള്ള രാവണല്ല. അതിനേക്കാൾ ഭയങ്കരൻ.ഒരേ സമയം പത്തിൽ കൂടുതൽ സിനിമകൾ വരെ കൈകാര്യം ചെയ്യുന്നൊരു രാവണൻ.നമ്മുടെ സ്വന്തം ബാദുക്ക. നമ്മുടെ ആലപ്പുഴക്കാരൻ.
2006ൽ പൃഥ്വിരാജ് ചിത്രം വർഗ്ഗത്തിലൂടെയാണ് ബാദുക്ക പ്രൊഡക്ഷൻ കണ്ട്രോളർ ആയി എത്തുന്നത് അതു വരെ ടൈറ്റിൽ കാർഡിൽ മാത്രം അധികമാരും ശ്രദ്ധിക്കാതെ നിന്നിരുന്ന പ്രൊഡക്ഷൻ കൺട്രോളർ തസ്തിക ബാദുക്കയ്ക്കു ശേഷം കുറച്ചു കൂടി ജനകീയമായി എന്നതാണ് സത്യം. പിന്നീട് എത്രയോ സിനിമകൾ മലയാളത്തിലെ ഏറ്റവും മുൻനിര ചിത്രങ്ങൾ എടുത്താൽ എവിടെയും ബാദുക്കയുണ്ട്..
രാവണൻ എഫക്ട് എന്നൊക്കെ പറയാമെങ്കിലും ഇതൊരു ബാദുക്ക എഫക്ട് തന്നെയാണ് ബാദുക്കയ്ക്കു മാത്രം സാധ്യമാകുന്ന കാര്യം.ഇപ്പോൾ അൽപ്പം അഭിനയത്തിലേക്കും നിർമ്മാണത്തിലേക്കും കൂടി റൂട്ട് മാറ്റിയിരിക്കുന്ന ബാദുക്ക വീണ്ടും വീണ്ടും നമ്മളെ ഞെട്ടിക്കുകയാണ്.
ഈ തിരക്കുകൾക്കൊക്കെ ഇടയിൽ ഈ കോവിഡ് ദുരിത കാലത്തും മുൻപ് പ്രളയ സമയത്തും സിനിമ പ്രവർത്തകരുടെ കൂട്ടായ്മയിൽ കമ്മ്യൂണിറ്റി കിച്ചണുമായി ഒരാളും പട്ടിണി കിടക്കരുത് എന്ന ഉദ്ദേശത്തിൽ ബാദുക്കയെത്തി. മലയാള സിനിമയുടെ മനുഷ്യത്വത്തിനു ബാദുക്ക എന്നൊരു മുഖം കൂടിയുണ്ട് എന്നു തെളിയിച്ചു കൊണ്ട്. നമ്മുടെ സ്വന്തം ബാദുക്കയ്ക്ക് ജന്മദിനാശംസകൾ