കോമഡി ഷോകളിലൂടെ ശ്രദ്ധ നേടിയ രമേഷ് പിഷാരടി അവതാരകനായും നടനായും സംവിധായകനായും പ്രേക്ഷകരുടെ കൈയ്യടി നേടിയിട്ടുണ്ട്. തന്റെ ഭാര്യക്ക് സര്പ്രൈസ് കൊടുക്കാന് നോക്കി പൊളിഞ്ഞു പോയ സംഭവത്തെ കുറിച്ചാണ് രമേഷ് പിഷാരടി ഇപ്പോള് തുറന്നു പറഞ്ഞിരിക്കുന്നത്.
ആദ്യത്തെ കുഞ്ഞ് ജനിക്കുമ്പോള് താന് ഇന്തോനേഷ്യയില് ആയിരുന്നു. ഒരു പരിപാടിക്കായി പോയതായിരുന്നു. തിരിച്ചുവരുന്ന വഴി, സിംഗപ്പൂര് എയര്പോര്ട്ടിലെ വൈഫൈയിലാണ് താന് കൊച്ചിന്റെ ഫോട്ടോ കാണുന്നത്. ഭാര്യ പൂനെയിലായിരുന്നു. നാട്ടിലെത്തിയ താന് സര്പ്രൈസ് ആയിട്ട് പോകാന് തീരുമാനിച്ചു.
നാളയേ വരികയുള്ളുവെന്ന് പറഞ്ഞിട്ട് അപ്പോള് തന്നെ ഫ്ളൈറ്റ് കയറി. ബസൊക്കെ കയറി അവളുടെ വീട്ടിലെത്തി. ഡോര് തുറന്നപ്പോള് അവളുടെ അമ്മയോട് താനാണെന്ന് പറയരുതെന്ന് ആംഗ്യത്തിലൂടെ പറഞ്ഞു. ഭാര്യയ്ക്ക് കണ്ണടയുണ്ട്. നല്ല പവറുള്ള കണ്ണടയാണ്. താന് നേരെ ചെന്ന് റൂമിന്റെ വാതില്ക്കല് നിന്നു.
അവള് കണ്ണട വച്ചിട്ടുണ്ടായിരുന്നില്ല. താനാണെങ്കില് നല്ല ദൂരെയാണ് നില്ക്കുന്നത്. ഫോക്കസ് ഔട്ടാണ്. അവള് അമ്മയോട്, അമ്മേ വന്നെന്നാണ് തോന്നുന്നതെന്ന് പറഞ്ഞു. തന്റെ സകല സര്പ്രൈസും അതോടെ പൊളിഞ്ഞു പോയി എന്നാണ് രമേഷ് പിഷാരടി ഒരു യൂട്യൂബ് ചാനലിന് നല്കിയ അഭിമുഖത്തില് പറഞ്ഞു.