വൈശാഖ് സംവിധാനം ചെയ്യുന്ന മമ്മൂട്ടി ചിത്രം ‘ടർബോ’യിലൂടെ മലയാളത്തിൽ അരങ്ങേറ്റം കുറിക്കാനൊരുങ്ങുകയാണ് കന്നഡ സൂപ്പർ താരം രാജ് ബി ഷെട്ടി. ജിഷോ ലോണ് ആന്റണി സംവിധാനം ചെയ്യുന്ന രുധിരം എന്ന ചിത്രത്തിലും രാജ് ബി ഷെട്ടി പ്രധാന വേഷത്തിലെത്തുന്നുണ്ട്.
ഇപ്പോഴിതാ മലയാള സിനിമകളെ കുറിച്ച് സംസാരിക്കുകയാണ് രാജ് ബി ഷെട്ടി. മലയാളം സിനിമ രാജ്യത്തെ ഒരു പ്രധാന സിനിമ വ്യവസായമാണെന്നും ജീത്തു ജോസഫ്, ഷൈജു ഖാലിദ്, അന്വര് റഷീദ്, സുഷിന് ശ്യാം, ഫഹദ് ഫാസില് എന്നിവരൊക്കെ കൂടിച്ചേരുമ്പോഴാണ് സിനിമയുടെ മാന്ത്രികത പ്രകടമാവുന്നതെന്നും രാജ് ബി ഷെട്ടി പറയുന്നു.
“മലയാളം നമ്മുടെ രാജ്യത്തെ ഒരു പ്രധാന സിനിമ വ്യവസായമാണ്. അതിനെ ചെറിയ ഒന്നായി അവഗണിക്കേണ്ടതില്ല. കഴിഞ്ഞ ആറ് മാസത്തിനുള്ളില് മലയാള സിനിമകള് ബോക്സ് ഓഫീസില് 1000 കോടി നേടിയത് ശ്രദ്ധേയമായ നേട്ടമാണ്.
മലയാളത്തില് ജിത്തു ജോസഫ്, ഷൈജു ഖാലിദ്, അന്വര് റഷീദ്, സുഷിന് ശ്യാം, ഫഹദ് ഫാസില് എന്നിവരൊക്കെയുണ്ട്. അവരെല്ലാവരും കൂടിച്ചേരുമ്പോഴാണ് സിനിമയുടെ മാന്ത്രികത പ്രകടമാകുന്നത്. എല്ലാ മേഖലകളിലും കഴിവുള്ള കലാകാരന്മാരെ നിലനിര്ത്തി കൊണ്ടുപോകുന്നതാണ് സിനിമ വ്യവസായത്തിന്റെ ശക്തി.” എന്നാണ് രാജ് ബി ഷെട്ടി പറയുന്നത്.
അതേസമയം ടർബോ മെയ് 23 നാണ് തിയേറ്ററുകളിൽ എത്തുന്നത്. മിഥുൻ മാനുവൽ തോമസാണ് ചിത്രത്തിന് തിരക്കഥയെഴുതുന്നത്. ഭ്രമയുഗത്തിന് ശേഷമെത്തുന്ന മമ്മൂട്ടി ചിത്രവും, കാതലിന് ശേഷം മമ്മൂട്ടി കമ്പനി നിർമ്മിക്കുന്ന ചിത്രവും കൂടിയാണ് ടർബോ. പോക്കിരി രാജ, മധുരരാജ എന്നീ ചിത്രങ്ങള്ക്ക് ശേഷം സംവിധായകന് വൈശാഖും മമ്മൂട്ടിയും ചിത്രം കൂടിയാണ് ടർബോ.
ദിലീഷ് പോത്തൻ, അഞ്ജന ജയപ്രകാശ്, സുനിൽ. ശബരീഷ് വർമ്മ, ബിന്ദു പണിക്കർ, ആമിന നിജം, നിരഞ്ജന അനൂപ് എന്നിവരാണ് ചിത്രത്തിലെ മറ്റ് പ്രധാന താരങ്ങൾ.
വൈശാഖിന്റെ കൂടെ സഹസംവിധായകനായി ഷാജി പാടൂരും പ്രവർത്തിക്കുന്നുണ്ട്. വിഷ്ണു ശർമയാണ് ചിത്രത്തിന് ഛായാഗ്രഹണം നിർവഹിക്കുന്നത്. ഭ്രമയുഗത്തിന് സംഗീത സംവിധാനം നിർവഹിച്ച ക്രിസ്റ്റോ സേവ്യർ ആണ് ടർബോയ്ക്ക് വേണ്ടി സംഗീത സംവിധാനം നിർവഹിക്കുന്നത്.
2021ല് ആണ് മമ്മൂട്ടി കമ്പനി എന്ന പ്രൊഡക്ഷന് ഹൗസ് സ്ഥാപിച്ചത്. റോഷാക്, നന്പകല് നേരത്ത് മയക്കം, കണ്ണൂര് സ്ക്വാഡ്, കാതല് എന്നിവയാണ് മമ്മൂട്ടി കമ്പനി ഇതുവരെ നിര്മ്മിച്ച ചിത്രങ്ങള്.