പൃഥ്വിരാജ് നായകനാകുന്ന ‘കുരുതി’ ഓഗസ്റ്റ് 11ന് ആമസോണ്‍ പ്രൈമില്‍ റിലീസിന് ഒരുങ്ങുകയാണ്. ചിത്രത്തില്‍ വ്യത്യസ്തമായൊരു വേഷമാണ് നടന്‍ മാമൂക്കോയ അവതരിപ്പിക്കുന്നത്. മാമൂക്കോയക്ക് ഒപ്പമുള്ള ലൊക്കേഷന്‍ അനുഭവങ്ങള്‍ പങ്കുവെച്ചിരിക്കുകയാണ് നടന്‍ പൃഥ്വിരാജ്. ഹസന്‍ എന്ന കഥാപാത്രമായാണ് മാമൂക്കോയ ചിത്രത്തില്‍ വേഷമിടുന്നത്. നടന്‍ റോഷനൊപ്പമുള്ള അഭിമുഖത്തിലാണ് പൃഥ്വിരാജിന്റെ പ്രതികരണം.
പൃഥിരാജിന്റെ വാക്കുകള്‍:
ഈ കഥാപാത്രത്തിനായി തന്റെ മനസില്‍ ആദ്യം തോന്നിയ കഥാപാത്രമാണ് മാമൂക്കോയ എന്നാണ് പൃഥ്വിരാജ് പറയുന്നത്. തിരക്കഥാകൃത്ത് അനീഷ് പള്ള്യാലും മാമൂക്കോയയെ കുറിച്ചാണ് പറഞ്ഞത്. എന്നാല്‍ സിനിമ തുടങ്ങുന്നതിന് മുമ്പ് മാമൂക്കോയയുടെ കാര്യത്തില്‍ തനിക്ക് പേടിയുണ്ടായിരുന്നുവെന്ന് പൃഥ്വിരാജ് പറയുന്നു.
എക്‌സിക്യൂട്ടീവ് പ്രൊഡ്യൂസര്‍ ഹാരിസിനെ വിളിച്ച് ഞാന്‍ ആദ്യം പറഞ്ഞത്, ഹാരിസേ എനിക്കിതില്‍ ചെറിയ പേടി മാമൂക്കോയ സാറിനെ കുറിച്ചാണ്. കാരണം നമ്മള്‍ ഇത്രയും ഇങ്ങനെ ഫാസ്റ്റ് ഫെയ്‌സ് ആയി ഷൂട്ട് ചെയ്യുമ്പോള്‍ അദ്ദേഹത്തിന് ക്ഷീണം വരുമോ, വയ്യായ്ക വരുമോ എന്നൊക്കെ. ഞാന്‍ ഞെട്ടിപ്പോയത് അദ്ദേഹം വളരെ ഷാര്‍പ് ആണെന്ന കാര്യത്തിലാണ്.
അദ്ദേഹത്തിന്റെ പ്രയമെന്താണെന്ന് എനിക്ക് കൃത്യമായി അറിയില്ല, എന്നാലും അദ്ദേഹത്തിന്റെ പ്രായം 75ന് മുകളിലേക്ക് പോകില്ല. മാമൂക്കോയ സാര്‍ ഒരു ഡയലോഗ് മറന്നു പോകുന്നത് ഞാന്‍ കണ്ടിട്ടില്ല. ഒരു ആക്ഷന്‍ കണ്ടിന്യൂവിറ്റി തെറ്റിക്കുന്നത് എനിക്ക് ഓര്‍മ്മ ഉണ്ടായിട്ടില്ല. ഒരു ദിവസം പോലും ക്ഷീണമുണ്ട് നേരത്തെ പോകാമോ എന്ന് ചോദിച്ചിട്ടില്ല.
ക്ലൈമാക്‌സില്‍ ഒക്കെ എന്തൊക്കെയാണ് അദ്ദേഹത്തെ കൊണ്ട് ചെയ്യിപ്പിച്ചത്. മാമൂക്കോയ സാറിന്റെ മുഖത്ത് എനിക്ക് കാണാന്‍ കഴിഞ്ഞത്, ആദ്യമായാണ് ഇങ്ങനെ ഒരു വേഷം കിട്ടിയത് ഇത് ഞാന്‍ പൊളിക്കും എന്ന ഭാവമാണ്. ഞാന്‍ ഇടയ്ക്കിടെ പോയി പറയും മാമ്മൂക്ക സാര്‍ വേണമെങ്കില്‍ ജീപ്പ് അറേഞ്ച് ചെയ്യാം.
കാരവാനില്‍ പോയി ഇരുന്നോളൂ ഏയ് വേണ്ട ഞാനിവിടെ ഇരുന്നോളാം. കാരവാനിലൊന്നും പോകാറില്ല. ഈ സിനിമ കഴിഞ്ഞപ്പോള്‍ എനിക്ക് തോന്നിയത് ഇത്രയും സിനിമ ചെയ്തിട്ടും കണ്ടെത്താന്‍ കഴിയാതെ നില്‍ക്കുന്ന നടനാണ് മാമൂക്കോയ എന്നാണ്.