ജയറാം ഒരു മികച്ച നടനാണെന്ന് കാര്ത്തി. ‘പൊന്നിയിന് സെല്വന് 2’വിന്റെ പ്രമോഷന്റെ ഭാഗമായി കൊച്ചിയില് നടന്ന പ്രസ് മീറ്റിലാണ് കാര്ത്തി സംസാരിച്ചത്. ജയറാമിന്റെ പെരുമാറ്റം തന്നെ അത്ഭുതപ്പെടുത്തി എന്നാണ് കാര്ത്തി പറയുന്നത്.
പൊന്നിയിന് സെല്വനില് കാര്ത്തിക്ക് ഏറെ കോമ്പിനേഷന് സീനുകളുണ്ടായത് ജയറാമിനൊപ്പമാണ്. ഓരോ വേഷം ചെയ്യുന്നതിനും ജയറാം എന്ന നടന് എടുക്കുന്ന തയ്യാറെടുപ്പ് വളരെ വലുതാണ്. സെറ്റിലും ഷോട്ടിനും ഇടയിലുള്ള അദ്ദേഹത്തിന്റെ പെരുമാറ്റം പലപ്പോഴും തന്നെ അത്ഭുതപ്പെടുത്തിയിട്ടുണ്ട്.
ജയറാം ചെയ്യുന്ന വേഷത്തിന് അഞ്ചടി ഉയരമാണ് വേണ്ടത്. എന്നാല് അദ്ദേഹത്തിന് ആറടി ഉയരം ഉണ്ട്. ഷൂട്ടിംഗ് ലൊക്കേഷനിലേക്ക് അദ്ദേഹം എത്തുമ്പോള് കാല് വളച്ചു വെച്ച് അഞ്ചടി ഉയരമുള്ള ആളായാണ് എത്തിയത് എന്നും കാര്ത്തി വ്യക്തമാക്കി.
ആള്കാവടിയാര് നമ്പി എന്ന കഥാപാത്രത്തെയാണ് ജയറാം ചിത്രത്തില് അവതരിപ്പിക്കുന്നത്. വല്ലവരയന് വന്ദിയതേവന് എന്ന കഥാപാത്രമായാണ് കാര്ത്തി വേഷമിടുന്നത്. അതേസമയം, ബാബു ആന്റണിയെ തനിക്ക് ഇപ്പോഴും പേടിയാണെന്നും കാര്ത്തി പറയുന്നുണ്ട്.
ബാബു ആന്റണി സാറിനെ ‘പൂവിഴി വാസലിലേ’ എന്ന ചിത്രത്തില് കാണുമ്പോഴേ പേടിയാണ്. ഇന്നും ബാബു ആന്റണി സാര് കയറി വരുമ്പോഴേക്കും പേടിയാണ്. അദ്ദേഹത്തോടൊപ്പം ഒരുമിച്ച് ജോലി ചെയ്യാന് കഴിഞ്ഞതില് സന്തോഷമുണ്ട് എന്നാണ് കാര്ത്തി പറഞ്ഞത്.