ഗാങ്സ് ഓഫ് വസായ്പൂര് എന്ന ചിത്രത്തിലൂടെ ശ്രദ്ധേയനായ ബോളിവുഡ് നടനാണ് പീയൂഷ് മിശ്ര. ഇപ്പോഴിതാ നടന് അടുത്തിടെ നടത്തിയിരിക്കുന്ന വെളിപ്പെടുത്തലാണ് ചര്ച്ചയാകുന്നത്. ഏഴാം ക്ലാസില് പഠിക്കുമ്പോള് തന്റെ ബന്ധുവായ ഒരു സ്ത്രീ ലൈംഗികമായി ചൂഷണം ചെയ്തതിനെ കുറിച്ചാണ് നടന് പങ്കുവെച്ചിരിക്കുന്നത്. തന്റെ ആത്മകഥാപരമായ നോവലായ തുംഹാരി ഔഖാത് ക്യാ ഹേ പിയൂഷ് മിശ്രയിലാണ് കുട്ടിക്കാലത്തെ അനുഭവത്തെ കുറിച്ച് അദ്ദേഹം എഴുതിയിരിക്കുന്നത്.
എങ്കിലും ആ വ്യക്തിയോട് ‘ പ്രതികാരം’ ചെയ്യാന് താന് ഒരിക്കലും ആഗ്രഹിച്ചിട്ടില്ലെന്ന് പിയുഷ് മിശ്ര അഭിമുഖത്തില് പറഞ്ഞു. അദ്ദേഹം പറഞ്ഞു, ‘ ലൈംഗികത വളരെ ആരോഗ്യകരമായ ഒരു കാര്യമാണ്, പക്ഷേ നിങ്ങളുടെ ആദ്യ അനുഭവം നല്ലതായിരിക്കണം, അല്ലാത്തപക്ഷം അത് നിങ്ങളുടെ ജീവിതത്തിനെ മുറിവേല്പ്പിക്കുന്നു, അത് നിങ്ങളെ ജീവിതത്തെ അസ്വസ്ഥമാക്കുന്നു.
ആ ലൈംഗികാതിക്രമം എന്റെ ജീവിതത്തിലുടനീളം കാര്യങ്ങള് സങ്കീര്ണ്ണമാക്കി, അതില് നിന്ന് പുറത്തുവരാന് എനിക്ക് വളരെയധികം സമയമെടുത്തു. ചില ആളുകളുടെ ഐഡന്റിറ്റി വെളിപ്പെടുത്താതിരിക്കാന് ഞാന് ആഗ്രഹിച്ചു. അവരില് ചിലര് സ്ത്രീകളും, ചില പുരുഷന്മാരും ആണ്. ഇപ്പോള് സിനിമാ മേഖലയില് നല്ല നിലയിലാണ് അവരെല്ലാം.
ആരോടും പ്രതികാരം ചെയ്യാനോ ആരെയും വേദനിപ്പിക്കാനോ ഞാന് ആഗ്രഹിച്ചില്ലെന്ന് പീയൂഷ് മിശ്ര പറയുന്നു. നടന് എന്നതിലുപരി, ബല്ലിമാരന് എന്ന സംഗീത ബാന്ഡിന്റെ ഗാനരചയിതാവും ഗായകനുമാണ് മിശ്ര.നാഷണല് സ്കൂള് ഓഫ് ഡ്രാമയില് നിന്ന് ബിരുദദാരിയായ അദ്ദേഹം സ്വന്തമായി ഒരു തിയേറ്റര് ഗ്രൂപ്പ് ആരംഭിച്ചിരുന്നു. സാള്ട്ട് സിറ്റി, ഇലീഗല് 2 എന്നീ വെബ് സീരീസുകളിലാണ് അദ്ദേഹം ഒടുവില് അഭിനയിച്ചത്