‘എബ്രഹാം ഓസ്ലര്’ എന്ന സിനിമയാണ് മിഥുന് മാനുവല് തോമസിന്റെതായി ഇനി തിയേറ്ററുകളില് എത്താനിരിക്കുന്നത്. ജനുവരി 11ന് ആണ് ചിത്രത്തിന്റെ റിലീസ്. ഇതിനിടെ ഓസ്ലര് കൂടാതെ തന്റെ തിരക്കഥയിലും സംവിധാനത്തിലും ഒരുങ്ങുന്ന മറ്റ് സിനിമകളെ കുറിച്ചാണ് ഇപ്പോള് മിഥുന് മാനുവല് ഇപ്പോള് സംസാരിച്ചിരിക്കുന്നത്.
മാതൃഭൂമിക്ക് നല്കിയ അഭിമുഖത്തിലാണ് സംവിധായകന് സംസാരിച്ചത്. മിഥുന്റെ തിരക്കഥയില് ഒരുങ്ങുന്ന ചിത്രമാണ് മമ്മൂട്ടിയുടെ ‘ടര്ബോ’. പ്രഖ്യാപിച്ചത് മുതല് ഹൈപ്പ്് നേടിയ ചിത്രമാണ് ടര്ബോ. മമ്മൂട്ടിയെ നായകനാക്കി വൈശാഖ് സംവിധാനം ചെയ്യുന്ന ടര്ബോ ആക്ഷന് കോമഡി ജോണറില് പെടുന്ന സിനിമയാണ്.
”ആദ്യമായാണ് അത്തരമൊരു ജോണറിലൊരു തിരക്കഥ എഴുതുന്നത്. മമ്മൂക്ക-വൈശാഖ് ടീമിന്റെ കൂടെ ടീം ടര്ബോയില് വര്ക്ക് ചെയ്യാനാകുന്നു എന്നതില് സന്തോഷമുണ്ട്. ഹിറ്റ് കോമ്പോ ആയതിനാല് പ്രേക്ഷകര്ക്കിടയിലും ആ ഹൈപ്പുണ്ടാകും എന്ന് എനിക്കറിയാം.”
”അതിനാല് പ്രേക്ഷകര്ക്ക് തിയേറ്ററില് ആഘോഷമാക്കാന് പറ്റുന്ന സിനിമയായി ‘ടര്ബോ’ മാറുമെന്നാണ് ഞങ്ങളുടെ എല്ലാവരുടെയും പ്രതീക്ഷ” എന്നാണ് മിഥുന് പറയുന്നത്. ‘ആട് 3’ തനിക്ക് വലിയ സമ്മര്ദ്ദമാണ് തരുന്നതെന്നും മിഥുന് വ്യക്തമാക്കി.
”കോട്ടയം കുഞ്ഞച്ചന് 2 എന്ന സിനിമ പല കാരണങ്ങളാല് ഉപേക്ഷിച്ചു എന്നത് നേരത്തേ പറഞ്ഞതാണ്. അനൗണ്സ് ചെയ്ത സിനിമകളില് ചെയ്യാന് സാധ്യതയുള്ളത് ആട് 3യും ആറാം പാതിരയുമാണ്. അതില് ആട് 3 എന്ന സിനിമ ചെയ്യണമെന്ന് എനിക്ക് ഒരുപാട് സമ്മര്ദം വരുന്നുണ്ട്.”
”എത്ര സിനിമകള് ചെയ്താലും എവിടെ പോയാലും എല്ലാവരും ചോദിക്കുന്നത് ആട് 3 എപ്പോള് വരും എന്നാണ്. കാരണം കുട്ടികളടക്കം വലിയൊരു ഫാന് ബേസുള്ള ഫ്രാഞ്ചൈസി ആണത്. തിരക്കഥ നല്ല രീതിയില് പൂര്ത്തിയാക്കാന് സാധിച്ചാല് ആട് 3 സമീപ ഭാവിയില് തന്നെ ചെയ്യണം എന്നൊരു ആഗ്രഹമുണ്ട്” എന്നാണ് മിഥുന് മാനുവല് പറയുന്നത്.