സെറ്റില്‍ താന്‍ വളരെ കര്‍ക്കശക്കാരനായ സംവിധായകനാണെന്ന് വെളിപ്പെടുത്തി മണിരത്നം. താന്‍ ആഗ്രഹിച്ച രീതിയിലുള്ള പ്രകടനം ലഭിച്ചില്ലെങ്കില്‍ അഭിനേതാക്കളെ കെട്ടിടത്തില്‍ നിന്നും താഴേക്ക് എറിയുമെന്ന് പറഞ്ഞ് ഭീഷണിപ്പെടുത്താറുണ്ട് എന്നാണ് മണിരത്നം തുറന്നു പറഞ്ഞിരിക്കുന്നത്. ‘തഗ് ലൈഫ്’ പ്രമോഷനിടെയാണ് സംവിധായകന്‍ സംസാരിച്ചത്.
അഭിനേതാക്കള്‍ക്ക് പൂര്‍ണ്ണ സ്വാതന്ത്ര്യം നല്‍കുന്ന സംവിധായകനാണോ എന്ന ചോദ്യത്തോട് പ്രതികരിക്കുകയായിരുന്നു മണിര്തനം. എല്ലാവരോടും താന്‍ അങ്ങനെയല്ലെന്ന് പറഞ്ഞായിരുന്നു മണിരത്നം മറുപടി ആരംഭിച്ചത്. ”ചില ആളുകളെ നിങ്ങള്‍ക്ക് ഭീഷണിപ്പെടുത്തേണ്ടി വരും. ഞാന്‍ ചോദിക്കുന്നത് ചെയ്തില്ലെങ്കില്‍ നാലാം നിലയില്‍നിന്ന് താഴേക്കിടുമെന്ന് ഭീഷണിപ്പെടുത്തിയിട്ടുണ്ട്.”
”അഞ്ച് വയസുള്ള കുട്ടികള്‍ക്ക് അസമയത്ത് ജോലി ചെയ്യാമെങ്കില്‍ നിങ്ങള്‍ക്ക് എന്തുകൊണ്ട് പറ്റില്ല എന്ന് ചില അഭിനേതാക്കളോട് ചോദിക്കേണ്ടി വരും. എല്ലാത്തിനും ഒരൊറ്റ പരിഹാരമില്ല” എന്നാണ് മണിരത്നം പറയുന്നത്. അതേസമയം, ജൂണ്‍ 5ന് ആണ് തഗ് ലൈഫ് തിയേറ്ററുകളില്‍ എത്തുന്നത്. കമല്‍ ഹാസന്‍ നായകനാകുന്ന ചിത്രത്തില്‍ സിമ്പു, തൃഷ, അഭിരാമി, നാസര്‍ എന്നിവരാണ് മറ്റ് കേന്ദ്ര കഥാപാത്രങ്ങളായി എത്തുന്നത്.
അശോക് സെല്‍വന്‍, അലി ഫസല്‍, പങ്കജ് ത്രിപാഠി, ജോജു ജോര്‍ജ്, ഐശ്വര്യ ലക്ഷ്മി, ജിഷു സെന്‍ഗുപ്ത, സാന്യ മല്‍ഹോത്ര, രോഹിത് ഷറഫ്, വൈയാപുരി എന്നിവരും ചിത്രത്തില്‍ പ്രധാന വേഷങ്ങളില്‍ എത്തുന്നുണ്ട്. രംഗരായ ശക്തിവേല്‍ നായ്ക്കര്‍ എന്നാണ് ചിത്രത്തില്‍ കമല്‍ ഹാസന്‍ അവതരിപ്പിക്കുന്ന കഥാപാത്രത്തിന്റെ പേര്.
