ലോക വിറ്റിലിഗോ ദിനത്തില്‍ തന്റെ ശരീരത്തിലെ രോഗാവസ്ഥ തുറന്നു കാട്ടി മംമ്ത മോഹന്‍ദാസ്. കീഴടക്കുക, ശക്തമാകുക, പോസിറ്റീവ്, ഓട്ടോഇമ്യൂണ്‍, സ്വയം സ്‌നേഹിക്കുക എന്നീ ഹാഷ്ടാഗുകളോടെയാണ് തന്റെ ചിത്രം നടി പങ്കുവച്ചത്. കഴിഞ്ഞ വര്‍ഷമാണ് ഓട്ടോ ഇമ്യൂണ്‍ അസുഖമായ വിറ്റിലിഗോ അഥവാ വെള്ളപ്പാണ്ട് എന്ന ത്വക്ക് രോഗം മംമ്തയ്ക്ക് ബാധിച്ചത്.
താരം തന്നെയാണ് ഇക്കാര്യം സോഷ്യല്‍ മീഡിയയിലൂടെ പങ്കുവച്ചത്. രണ്ട് തവണ കാന്‍സറിനെ അതിജീവിച്ച മംമ്തയുടെ ജീവിതം ഏവര്‍ക്കും പ്രചോദനമാണ്. അതിനാല്‍ തന്നെ താന്‍ പുതിയൊരു രോഗവുമായി പോരാട്ടത്തിലാണെന്ന് പറയാന്‍ മംമ്ത മടിച്ചില്ല.
തന്റെ തൊലിപ്പുറത്തെ യഥാര്‍ഥ അവസ്ഥ യാതൊരു മറയും കൂടാതെ പങ്കുവച്ചിരിക്കുകയാണ് നടി ഇപ്പോള്‍. ‘വാനില ആകാശത്തെ തൊടാന്‍ വളരുന്ന ചോക്ലേറ്റ്’ എന്നാണ് വിറ്റിലിഗോ ബാധിച്ച തന്റെ ചിത്രം പങ്കുവച്ച് മംമ്ത കുറിച്ചത്. വിറ്റിലിഗോയിലൂടെ കടന്നു പോവുന്നവര്‍ക്ക് പോസിറ്റിവിറ്റി നല്‍കുന്ന ഈ കുറിപ്പിനെ അഭിനന്ദിക്കുകയാണ് സോഷ്യല്‍ മീഡിയ.
ശരീരത്തിന്റെ രോഗപ്രതിരോധ സംവിധാനത്തെ ബാധിക്കുന്ന അവസ്ഥയാണ് ഓട്ടോ ഇമ്യൂണല്‍ ഡിസോര്‍ഡര്‍. രോഗപ്രതിരോധ സംവിധാനത്തിന്റെ അമിതവും വികലവുമായ പ്രതികരണമാണ് ഓട്ടോ ഇമ്യൂണ്‍ ഡിസോര്‍ഡേഴ്സ് എന്ന പേരില്‍ അറിയപ്പെടുന്ന ഒരു വിഭാഗം അസുഖങ്ങള്‍.
ഇതുമൂലം പ്രതിരോധ സംവിധാനത്തിന് നമ്മുടെ സ്വന്തം കോശങ്ങളെ തിരിച്ചറിയാന്‍ കഴിയാത്ത അവസ്ഥ വരും. ശരീരത്തിലെ നിറം നഷ്ടമാകുന്ന വിറ്റിലിഗോ എന്ന ഓട്ടോ ഇമ്യൂണല്‍ ഡിസോര്‍ഡര്‍ ആണ് മംമ്തയെ ബാധിച്ചത്. മെലാനിന്റെ കുറവു മൂലം ഇവ ബാധിക്കാം.
