രാജമൗലി സിനിമയുടെ സെറ്റില് താന് പ്രശ്നമുണ്ടാക്കിയതിനെ കുറിച്ച് തുറന്നു പറഞ്ഞ് നടി മംമ്ത മോഹന്ദാസ്. മുമ്പ് ധരിച്ചിട്ടില്ലാത്ത തരത്തിലുള്ള ചെറിയ വസ്ത്രങ്ങള് ധരിക്കാന് പറഞ്ഞപ്പോഴായിരുന്നു താന് പ്രശ്നമുണ്ടാക്കിയത് എന്നാണ് ഗലാട്ട പ്ലസിന് നല്കിയ അഭിമുഖത്തില് പറഞ്ഞിരിക്കുന്നത്. ‘യമദൊങ്ക’ എന്ന രാജമൗലി ചിത്രത്തിലാണ് മംമ്ത അഭിനയിച്ചത്.
”വലിയ സെറ്റായിരുന്നു. ഞാന് മുമ്പ് ധരിച്ചിട്ടില്ലാത്ത വസ്ത്രങ്ങള്. ഞാന് സെറ്റില് ചെറിയ പ്രശ്നമുണ്ടാക്കുകയും ചെയ്തിട്ടുണ്ട്. ഷോര്ട്ട് ആയ വസ്ത്രം ധരിക്കാന് പറഞ്ഞപ്പോഴായിരുന്നു. അത് എന്നെ അസ്വസ്ഥയാക്കിയിരുന്നു. സെറ്റില് 200 പേരുണ്ട്. മലയാളം സെറ്റ് പോലെയായിരുന്നില്ല. എന്നിട്ട് ഡാന്സ് ചെയ്യണം.”
”എനിക്കിതൊക്കെ അസാധാരണമായിരുന്നു. സിനിമയിലേക്ക് വരുമെന്ന് കരുതിയ ഒരാളല്ലായിരുന്നു ഞാന്. എല്ലാം വേഗത്തിലാണ് സംഭവിച്ചത്. വളരെ ഇന്റന്സ് ആയൊരു സംവിധായകനാണ് രാജമൗലി സാര്. ചിലപ്പോള് ആളുകള്ക്ക് അദ്ദേഹത്തെക്കുറിച്ച് ദേഷ്യക്കാരനെന്ന് തോന്നിയേക്കും.”
”അദ്ദേഹത്തിന്റെ ഭാര്യ എപ്പോഴും സെറ്റിലുണ്ടാകുമായിരുന്നു. മംമ്ത അദ്ദേഹം അങ്ങനെ ഉദ്ദേശിച്ചതല്ല, സിനിമ ചെയ്യുമ്പോള് അദ്ദേഹമൊരു ഭ്രാന്തനാണ് എന്നൊക്കെ പറഞ്ഞ് ആശ്വസിപ്പിക്കുമായിരുന്നു. ഓക്കെ ആന്റി എന്ന് ഞാന് പറയും. ഒരുപാട് പഠിക്കാനുണ്ടായിരുന്നു അതില് നിന്നൊക്കെ” എന്നാണ് മംമ്ത പറയുന്നത്.
അതേസമയം, 2007ല് പുറത്തിറങ്ങിയ ചിത്രമാണ് യമദൊങ്ക. ജൂനിയര് എന്ടിആര്, മോഹന് ബാബു, പ്രിയാമണി, അലി, ബ്രഹ്മാനന്ദം എന്നീ താരങ്ങളാണ് മറ്റ് പ്രധാന വേഷങ്ങളില് എത്തിയത്. വിജയേന്ദ്ര പ്രസാദിന്റെ കഥയ്ക്ക് രാജമൗലി തന്നെയായിരുന്നു തിരക്കഥ ഒരുക്കിയത്.