ആമിര്‍ ഖാന്‍ തന്റെ കരിയറിനെ കുറിച്ച് പ്രവചിച്ചതിനെ കുറിച്ച് പറഞ്ഞ് മാളവിക മോഹനന്‍. പ്രശസ്ത ഛായാഗ്രാഹകന്‍ കെയു മോഹനന്റെ മകളാണ് മാളവിക. ചെറുപ്പത്തില്‍ താന്‍ അച്ഛനൊപ്പം സിനിമാ ലൊക്കേഷനില്‍ പോയിരുന്നതായും ആമിര്‍ ചിത്രത്തില്‍ ചെറിയൊരു ഷോട്ടില്‍ അഭിനയിച്ചതായും മാളവിക പറയുന്നുണ്ട്.
ഇടയ്‌ക്കൊക്കെ അച്ഛനൊപ്പം സിനിമകളുടെ സെറ്റിലും പോയിട്ടുണ്ട്. താരങ്ങളോട് ഒരു സാധാരണ കൗമാരക്കാരിയ്ക്ക് തോന്നുന്ന ത്രില്‍ മാത്രമാണ് ആദ്യം തോന്നിയത്. മുംബൈയില്‍ ആമിര്‍ ഖാന്റെ ഒരു സിനിമയുടെ ഷൂട്ടിംഗ് നടക്കുമ്പോള്‍ അച്ഛനൊപ്പം താനും പോയിരുന്നു.
താന്‍ കോളേജില്‍ പഠിക്കുകയായിരുന്നു. ആ സിനിമയില്‍ ചെറിയൊരു ഷോട്ടില്‍ താനും കൂട്ടുകാരികളും അഭിനയിച്ചു. ഷൂട്ടിംഗിനിടയില്‍ അപ്രതീക്ഷിതമായി അദ്ദേഹം തന്നോട് എന്തായി തീരാനാണ് ആഗ്രഹമെന്ന് ചോദിച്ചു. കരിയറിനെ കുറിച്ച് ഒരു കണ്‍ഫ്യൂഷനിലാണെന്ന് പറഞ്ഞു.
അപ്പോള്‍ ‘നീ ഒരു നടിയായിത്തീരും’ എന്ന് അദ്ദേഹം പറഞ്ഞു. അന്ന് താനത്ര വിശ്വസിച്ചില്ല. എന്തായാലും പ്രവചനം സത്യമായെന്നാണ് മാളവിക പറയുന്നത്. വീട്ടില്‍ എപ്പോഴും സിനിമകളുടെ ഡിവിഡികള്‍ ഉണ്ടായിരുന്നു. ആ ഡിവിഡികളാണ് തന്റെ സിനിമാ മോഹങ്ങളുടെ വാതില്‍ തുറന്നത് എന്നും മാളവിക പറയുന്നത്.
‘പട്ടം പോലെ’ എന്ന ചിത്രത്തിലൂടെയാണ് മാളവിക സിനിമയില്‍ അരങ്ങേറ്റം കുറിക്കുന്നത്. തുടര്‍ന്ന് കന്നഡ, ഹിന്ദി, തമിഴ് സിനിമകളില്‍ എല്ലാം താരം വേഷമിട്ടിട്ടുണ്ട്. ‘ദ ഗ്രേറ്റ് ഫാദര്‍’ ആയിരുന്നു മാളവികയുടെതായി ഒടുവില്‍ റിലീസ് ചെയ്ത മലയാള ചിത്രം. നാല് വര്‍ഷങ്ങള്‍ക്ക് ശേഷം വീണ്ടും ‘ക്രിസ്റ്റി’ എന്ന ചിത്രത്തിലൂടെ താരം മലയാളത്തിലേക്ക് എത്തുകയാണ്.