മഹേഷ് നാരായണന്-ഫഹദ് ഫാസില് ചിത്രം മാലിക് ആണ് സോഷ്യല് മീഡിയ ചര്ച്ചകളില് നിറഞ്ഞു നില്ക്കുന്നത്. ജൂണ് 15ന് ആമസോണ് പ്രൈമിലാണ് ചിത്രം റിലീസായത്. ചിത്രത്തില് നിമിഷ സജയന് ചെയ്ത കഥാപാത്രത്തെ കുറിച്ചുള്ള ചോദ്യങ്ങള്ക്ക് മറുപടി നല്കിയിരിക്കുകയാണ് മഹേഷ് നാരായണന്.
ടേക്ക് ഓഫ് ചിത്രത്തിലെ പാര്വതിയുടെ കഥാപാത്രത്തെ കുറിച്ച് പറഞ്ഞാണ് സംവിധായകന് നിമിഷയുടെ കഥാപാത്രത്തെ കുറിച്ച് വിശദീകരിച്ചത്. ടേക്ക് ഓഫില് പാര്വതിയെ കണ്ട ശേഷം ഇത്രയധികം ബുദ്ധിമുട്ടുകള് അനുഭവിക്കുന്ന സ്ത്രീയായത് കൊണ്ട് അവരെ കാണാന് തന്നെ തോന്നുന്നില്ലാല്ലോ എന്ന് ചിലര് പറഞ്ഞിരുന്നു.
എന്നാല് മാലികില് അങ്ങനെയല്ല. എല്ലാ കഥാപാത്രങ്ങള്ക്കും വേരിയേഷന് കൊണ്ടു വരാന് ശ്രമിച്ചിട്ടുണ്ട്. പ്രണയവും വിരഹവും ദുഖവും പ്രതികാരവും എല്ലാം ഉള്പ്പെടുത്തിയിരിക്കുന്ന സിനിമയായിട്ടാണ് മാലിക്കിനെ കാണുന്നത് എന്നാണ് മഹേഷ് നാരായണന് കൗമുദിക്ക് നല്കിയ അഭിമുഖത്തില് പറയുന്നത്.
അതേസമയം, സിനിമയിലെ പ്രധാന സംഭവമായ ബീമാപ്പള്ളി വെടിവയ്പ്പിനെ കുറിച്ചാണ് സോഷ്യല് മീഡിയയില് ചോദ്യങ്ങള് ഉയരുന്നത്. പല ചരിത്ര സത്യങ്ങളും സിനിമ തമസ്കരിക്കുന്നതായും ഇല്ലാത്ത പലതും കൂട്ടിച്ചേര്ക്കുന്നതായും വിമര്ശനങ്ങള് ഉയരുന്നുണ്ട്.