മലയാള സിനിമയിൽ ഏറെ പ്രിയപ്പെട്ട താരജോഡികളായിരുന്നു കുഞ്ചാക്കോ ബോബനും ശാലിനിയും. ‘അനിയത്തിപ്രാവ്’ എന്ന ചിത്രത്തിലൂടെയാണ് കുഞ്ചാക്കോ സിനിമയിൽ അരങ്ങേറ്റം കുറിച്ചതും ശാലിനി ആദ്യമായി നായികാവേഷത്തിൽ എത്തിയതും. സിനിമയോടൊപ്പം തന്നെ ഇരുവരും പ്രേക്ഷകരുടെ ഇഷ്ടജോഡികളായി മാറുകയായിരുന്നു. ശാലിനി-അജിത് പ്രണയത്തെക്കുറിച്ച് കുഞ്ചാക്കോ ബോബൻ പറഞ്ഞ വാക്കുകളാണ് ഇപ്പോൾ ശ്രദ്ധ നേടുന്നത്.
നിറം എന്ന ചിത്രത്തിൽ അഭിനയിക്കുന്ന സമയത്താണ് കുഞ്ചാക്കോ ബോബൻ – ശാലിനി പ്രണയം വലിയ രീതിയിൽ ചർച്ചയാകുന്നത്. ഈ സമയത്ത് ശാലിനി – അജിത് പ്രണയത്തിൽ ഹംസമായി നിൽക്കുകയായിരുന്നു കുഞ്ചാക്കോ എന്ന് ഏതാനും വർഷങ്ങൾക്ക് മുൻപ് നടൻ തന്നെ തുറന്നു പറഞ്ഞിരുന്നു.
ശാലിനിയുടെയും കുഞ്ചാക്കോ ബോബന്റെയും പേരുകൾ ചേർത്ത് ഗോസിപ്പുകൾ വന്നപ്പോഴും എന്തുകൊണ്ടാണ് ഇക്കാര്യം തുറന്നു പറയാതിരുന്നത് എന്ന് പറയുകയാണ് താരം ഇപ്പോൾ. മൈൽസ്റ്റോൺ മേക്കേഴ്‌സ് ചാനലിന് നൽകിയ അഭിമുഖത്തിലാണ് കുഞ്ചാക്കോ ഇക്കാര്യം പറഞ്ഞത്. ഞാൻ ഭയങ്കര മാന്യനായതുകൊണ്ടാണ് അത് തുറന്നു പറയാതിരുന്നത് എന്നാണ് കുഞ്ചാക്കോ പറയുന്നത്. നല്ലൊരു സൗഹൃദമാണ് ഇരുവർക്കിമിടയിൽ ഉണ്ടായിരുന്നതെന്നും രണ്ടു പേരുടെയും പ്രണയം പരസ്പരം അറിയാമായിരുന്നു എന്നും കുഞ്ചാക്കോ പറഞ്ഞു.
ഇത്രയധികം ഗോസിപ്പുകൾ വന്നിട്ടും എന്തുകൊണ്ടാണ് ഇക്കാര്യം പുറത്തു പറയാതിരുന്നത് എന്ന ചോദ്യത്തിന് ‘ശാലിനിയും അജിത്തും തമ്മിലുള്ള പ്രണയം നടക്കുന്ന സമയത്ത് ഒരു ഹംസമായി ഇടയ്ക്ക് നിന്നത് താൻ ആയിരുന്നുവെന്നും അത് പുറത്തു പറയാതിരുന്നത് താൻ ഭയങ്കര മാന്യനായതുകൊണ്ടാണ് എന്നുമാണ് കുഞ്ചാക്കോ പറഞ്ഞത്.