മകളുടെ അപ്രതീക്ഷിത വിയോഗത്തില് ആദ്യമായി പ്രതികരിച്ച് വിജയ് ആന്റണി. മകള്ക്കൊപ്പം താനും മരിച്ചു എന്നാണ് താരം പങ്കുവച്ച കുറിപ്പില് പറയുന്നത്. കഴിഞ്ഞ ചൊവ്വാഴ്ച്ചയാണ് വിജയ് ആന്റണിയുടെ മൂത്ത മകള് മീര ജീവനൊടുക്കിയത്.
വീട്ടിലെ മുറിയില് തൂങ്ങിമരിച്ച നിലയിലായിരുന്നു മകളെ കണ്ടെത്തിയത്. ബുധനാഴ്ച്ച ചെന്നൈയില് വെച്ചായിരുന്നു സംസ്കാര ചടങ്ങുകള് നടന്നത്. തന്നെ വിട്ടുപോയെങ്കിലും അവള് എന്നും കൂടെയുണ്ടാകുമെന്നും ഇനി താന് ചെയ്യുന്ന എല്ലാ നല്ല കാര്യങ്ങളും മകള്ക്ക് വേണ്ടിയായിരിക്കുമെന്നും വിജയ് ആന്റണി കുറിപ്പില് പറയുന്നുണ്ട്.
”എന്റെ പ്രിയപ്പെട്ടവരേ, ധൈര്യശാലിയും ദയയുള്ളവളുമായിരുന്നു എന്റെ മകള് മീര. മതമോ ജാതിയോ മതമോ പണമോ അസൂയയോ വേദനയോ ദാരിദ്ര്യമോ തിന്മയോ ഇല്ലാത്ത ശാന്തമായ ഒരു സ്ഥലത്തേക്ക് അവള് യാത്രയായി. ഇപ്പോഴും അവള് എന്നോട് സംസാരിക്കാറുണ്ടെന്ന് തോന്നുന്നു.”
”അവള്ക്കൊപ്പം ഞാനും മരിച്ചുകഴിഞ്ഞു. ഇപ്പോള് അവള്ക്കൊപ്പം സമയം ചിലവഴിക്കാന് തുടങ്ങിയിരിക്കുന്നു. ഞാന് തുടങ്ങുന്ന ഏതൊരു നല്ല പ്രവൃത്തിയും അവളുടെ പേരില് ആയിരിക്കും. എല്ലാം ആരംഭിക്കുന്നത് അവളായിരിക്കുമെന്നും വിശ്വസിക്കുന്നു” എന്നാണ് വിജയ് ആന്റണിയുടെ വാക്കുകള്.