മോഹന്ലാലിന്റെ മുഖത്ത് നോക്കി അദ്ദേഹത്തിന്റെ സിനിമ മോശമാണെന്ന് താന് പറഞ്ഞിട്ടുണ്ടെന്ന് നിര്മ്മാതാവ് എസ് ചന്ദ്രകുമാര്. കാര്യങ്ങള് സത്യസന്ധമായി പറയുന്ന ആളുകളെ മോഹന്ലാലിന് വലിയ ഇഷ്ടമാണെന്നും താന് പറഞ്ഞതിനെ വളരെ പോസിറ്റീവായിട്ടാണ് അദ്ദേഹം എടുത്തതെന്നും ചന്ദ്രകുമാര് പറഞ്ഞു.
‘ഏകദേശം ഒന്നിച്ച് ഒരേ സമയത്താണ് താണ്ഡവും ഒന്നാമനും റിലീസ് ചെയ്യുന്നത്. മോഹന്ലാലിനോടൊപ്പം ചിത്രാഞ്ജലിയില് വെച്ചാണ് ഈ സിനിമ കാണുന്നത്. കണ്ട മാത്രയില് തന്നെ ഈ ചത്രം വിജയിക്കില്ലെന്ന് മോഹന്ലാലിനോട് ഞാന് പറഞ്ഞു.’
‘സാധാരണ മോഹന്ലാലിനോട് ഇങ്ങനെ പറയാന് ആരും ധൈര്യപ്പെടാറില്ല. എന്നാല് അദ്ദേഹത്തിന് വിമര്ശനങ്ങള് ചൂണ്ടി കാണിക്കുന്നത് ഭയങ്കര ഇഷ്ടമാണ്. കൂടാതെ ചെയ്ത സിനിമ വിജയിക്കില്ലെന്ന് അഭിനയിക്കുമ്പോള് തന്നെ അറിയാം.’
‘സിനിമ പുറത്ത് ഇറങ്ങിയാല് അതിന്റെ ഭാവി അവിടെ കഴിഞ്ഞുവെന്ന് വിശ്വസിക്കുന്ന ആളാണ് മോഹന്ലാല്. പടം പൊട്ടിക്കഴിഞ്ഞാല് ചിത്രം മരണപ്പെട്ടതായിട്ടാണ് അദ്ദേഹം കാണുന്നത്. ജീവിച്ചിരിക്കുന്ന സിനിമകളെ കുറിച്ചും കഥാപാത്രങ്ങളെ കുറിച്ചും മാത്രമേ അദ്ദേഹം ചിന്തിക്കാറുള്ളൂ.’ മാസ്റ്റര് ബിന് എന്ന യൂട്യൂബ് ചാനലിന് നല്കിയ അഭിമുഖത്തില് ചന്ദ്രകുമാര് പറഞ്ഞു.